Пентагон Украина учун мўлжалланган қуролларни Яқин Шарққа йўналтириши мумкин

АҚШ Украина учун мўлжалланган қурол-яроғнинг бир қисмини Эронга қарши уруш эҳтиёжлари учун йўналтириш имкониятини ўрганмоқда. The Washington Post ёзишича, бу Россияга қарши мудофаа уруши қизғин паллада турган Украина мудофаа қобилиятига салбий таъсир кўрсатиши мумкин.

Фото: AP

Пентагон дастлаб Украина учун мўлжалланган қурол-яроғнинг бир қисмини Яқин Шарққа кўчириш имкониятини кўриб чиқмоқда. Бу ҳақда 26 март, пайшанба куни The Washington Post (WP) газетаси хабардор уч манбага таяниб хабар берди. Гап, хусусан, 2025 йилда йўлга қўйилган НАТО ташаббуси доирасида сотиб олинган ҳаво ҳужумидан мудофаа тизимлари учун тутиб қолувчи ракеталар ҳақида кетмоқда. Ушбу дастурга кўра, ҳамкор давлатлар Киев учун Америка қуролларини харид қилади.

Бу масаланинг кўриб чиқилиши АҚШнинг Яқин Шарқдаги операциялари кенгайиб бораётган вақтга тўғри келди. АҚШ Марказий қўмондонлиги раҳбари адмирал Брэд Купер 25 март куни Америка кучлари Эрон ҳудудида 10 мингдан ортиқ нишонга зарба берганини ва Теҳроннинг “ўз чегараларидан ташқарида куч намойиш этиш” имкониятларини изчил равишда чеклаётганини айтди.

Пентагон вакили WP'га АҚШ Мудофаа вазирлиги “Америка кучлари, шунингдек иттифоқчилар ва ҳамкорлар кучларини жанг олиб бориш ва ғалаба қозониш учун зарур бўлган барча нарса билан таъминлашини” билдирди.

Шу орада, НАТО расмий вакили Reuters агентлиги сўровига жавобан алянс аъзолари ва унинг ҳамкорлари Украина учун Америка қуролларини етказиб беришни молиялаштирувчи устувор харидлар дастури — PURL'да иштирок этишда давом этаётганини айтди.

“Техника Украинага узлуксиз равишда етказиб берилмоқда”, — дея таъкидлади алянс вакили.

Унинг сўзларига кўра, PURL доирасида ваъда қилинган маблағлар ҳажми аллақачон бир неча миллиард долларга етган ва янги бадаллар келиб тушиши кутилмоқда.

Пентагон ва АҚШ Давлат департаменти Reuters сўровларига жавоб бермаган.

Шу билан бирга, АҚШ президенти Доналд Трамп НАТО давлатлари Эрон атрофидаги вазият муносабати билан ёрдам бериш учун “мутлақо ҳеч нарса” қилмаганини билдирди.

“АҚШга НАТОдан ҳеч нарса керак эмас, аммо бу жуда муҳим нуқтани ҳеч қачон унутманг!” — деб ёзди Трамп 26 март куни ўзининг Truth Social ижтимоий тармоғида.