Зеленский: Украина сулҳни қўллаб-қувватлайди

Кремл томонидан Пасха сулҳи эълон қилинишига жавобан Украина президенти Володимир Зеленский ўз мамлакати “худди шундай қадамлар”га тайёрлигини билдирди ва Киев бугунга қадар ҳам Пасха даври учун ўт очишни тўхтатишни таклиф қилганини эслатди. Бу ҳақда у 9 апрел, пайшанба куни кечқурун ижтимоий тармоқларда ёзди.

“Украина бир неча бор биз шундай қадамларга тайёр эканимизни айтган. Биз бу йил Пасха байрамлари вақтида ўт очишни тўхтатишни таклиф қилган эдик ва шунга мувофиқ ҳаракат қиламиз, — деди Зеленский. — Одамларга таҳдидларсиз Пасха ва тинчлик сари ҳақиқий ҳаракат керак. Россияда эса Пасхадан кейин ҳам ўқ узишларни қайта бошламаслик имконияти бор”.

Шунингдек, шу куни Кремл сайтида Россия президенти Владимир Путин Украинага қарши урушда Пасха муносабати билан 11 апрел соат 16:00 дан Москва ва Киев вақти билан 12 апрел охиригача сулҳ эълон қилгани ҳақида хабар берилган эди.

Апрел ойи бошида Володимир Зеленский Украина “Россияга камида Пасхагача ўт очишни тўхтатишни бир неча бор таклиф қилганини”, аммо унинг сўзларидан англашилишича, бу таклиф розилик олмаганини билдирганди. Украина президенти 30 март куни ҳам Пасха даврида Россия билан энергетика соҳасида сулҳ масаласини муҳокама қилишга Киев тайёр эканини айтган эди. Ўшанда Путин матбуот котиби Дмитрий Песков Зеленскийнинг бу сўзларида Россия томони “аниқ ифодаланган ташаббусни кўрмаганини” билдирган.

Бир йил олдин Владимир Путин Пасхадан бир кун аввал — 2025 йил 19 апрел кечқурун Украинада сулҳ ва жанговар ҳаракатларни тўхтатишни эълон қилган эди. Зеленский бу ташаббусга розилик билдирган ва Россияга унинг амал қилиш муддатини узайтиришни таклиф этган. Бироқ орадан бир кун ўтиб, Киев ва Москва бир-бирини ўт очишни тўхтатиш тартибини бузганликда айблаган.