Исроил ва Ливан тинчлик музокаралари томон қадам ташлади

Қайд этилишича, бу учрашув 1993 йилдан буён икки давлат вакиллари ўртасидаги илк мулоқот бўлди. Музокараларнинг аниқ вақти ва жойи кейинроқ келишиб олинади.

АҚШ мазкур учрашувни “тарихий босқич” деб баҳолаб, кейинги музокараларда ҳам воситачилик қилишга тайёрлигини билдирди. Вашингтон ушбу жараён кенг қамровли тинчлик келишувига олиб келишидан умид билдирди.

Давлат департаменти баёнотида АҚШ Исроилнинг “Ҳизбуллоҳ” томонидан амалга оширилаётган ҳужумлардан ҳимояланиш ҳуқуқини қўллаб-қувватлаши таъкидланди. Шунингдек, ҳар қандай ўт очишни тўхтатиш бўйича келишув АҚШ воситачилигида икки давлат ҳукуматлари ўртасида амалга оширилиши кераклиги қайд этилди.

Вашингтоннинг таъкидлашича, ушбу музокаралар Ливанни тиклаш ва иқтисодий ривожлантиришга катта ёрдам кўрсатиши, шунингдек, икки давлат учун инвестиция имкониятларини кенгайтириши мумкин.

Икки соат давом этган музокаралар уч томонлама форматда — АҚШ давлат котиби Марко Рубио, АҚШ Давлат департаменти маслаҳатчиси Майкл Нидхэм, АҚШнинг Ливандаги элчиси Мишел Исса, Исроилнинг АҚШдаги элчиси Йехиэль Лейтер ва Ливаннинг АҚШдаги элчиси Нада Хамаде Моавад иштирокида ўтди.

Ливан элчиси музокаралар якунлари бўйича мамлакат телеканалига берган интервьюсида, учрашувда ўт очишни тўхтатиш, уруш туфайли уйини тарк этган аҳолини қайтариш ва чуқур гуманитар инқирозни ҳал этиш бўйича аниқ қадамлар келишиб олишга чақирганини билдирди.

АҚШ Давлат департаменти маълумотига кўра, Исроил Ливандаги барча нодавлат ва “террористик” гуруҳларни қуролсизлантириш ва уларнинг инфратузилмасини йўқ қилиш ғоясини қўллаб-қувватлаган. Шунингдек, Исроил бу мақсадга эришиш учун Ливан ҳукумати билан ҳамкорлик қилишга тайёрлигини билдирган.

Исроил ташқи ишлар вазири Гидеон Саар эса матбуот анжуманида мамлакат “Ливан билан тинчлик ва муносабатларни нормаллаштиришга интилаётгани”ни айтди. Унинг таъкидлашича, асосий муаммо давлатлар ўртасида эмас, балки “Ҳизбуллоҳ”да.

Шу билан бирга, “Ҳизбуллоҳ” ҳаракати тинчлик музокараларига қарши чиқиб, учрашув бошланган пайтда Исроилга ҳужум уюштиргани қайд этилди.

Матнда таъкидланишича, АҚШ ва Исроил 28 февралдан буён Эронга қарши ҳаво зарбалари амалга оширган. Беш ҳафта давом этган жанглардан сўнг томонлар икки ҳафталик ўт очишни тўхтатишга келишган.

Бу сулҳ Исроилнинг Ливандаги “Ҳизбуллоҳ”га қарши амалга ошираётган ҳужумларига татбиқ этилмаган. Ливан маълумотига кўра, 8 апрель кунги ҳужумлар оқибатида 350 киши ҳалок бўлган, 1000 дан ортиқ одам яраланган.

9 апрель куни Исроил ҳукумати Биньямин Нетаньяҳу Ливан билан “Ҳизбуллоҳ”ни қуролсизлантириш ва тинчлик ўрнатиш бўйича тўғридан тўғри музокараларни бошлаш топшириғини берганини маълум қилди.