Трамп Эронни «ер юзидан супуриб ташлаш» билан таҳдид қилди

АҚШ президенти Доналд Трамп агар эронликлар Американинг «Озодлик лойиҳаси» амалиётида (Ҳўрмуз бўғозида қолиб кетган савдо кемаларини хавфсиз олиб чиқишга қаратилган) иштирок этувчи кемаларига ҳужум қиладиган бўлса, Эрон «ер юзидан супуриб ташланиши» билан таҳдид қилди. Бу ҳақда Трамп Fox News мухбири Трей Ингстга берган интервюсида маълум қилган.

«Мен президент Трамп билан Эрон билан боғлиқ вазият ҳақида 20 дақиқа суҳбатлашдим. У «Озодлик лойиҳаси» ва АҚШнинг Ҳўрмуз бўғозидаги савдо кемаларини кузатиб бориш бўйича саъй-ҳаракатлари ҳақида гапирди. У Эронга янги огоҳлантириш бериб, агар эронликлар бу ҳудуддаги Америка кемаларига ҳужум қилишга уринса, „улар ер юзидан йўқ қилиниши“ни айтди», – деган Ингст Fox News эфирида.

Урушни тугатиш бўйича музокаралар қандай кетаётгани ҳақидаги саволга жавобан Трамп эронликлар «анча муросасоз» бўлиб қолганини айтган.

Трамп «Озодлик лойиҳаси» ҳақида 3 май куни кечқурун эълон қилганди. 4 май куни АҚШ қуролли кучлари Марказий қўмондонлиги раҳбари, адмирал Брэд Купер америкалик ҳарбийлар Эрон томонидан АҚШ ҳарбий кемалари ҳамда савдо кемаларига қарата учирилган ракета ва дронларни уриб туширганини маълум қилди – бу вақтда улар Ҳўрмуз бўғозини кесиб ўтаётган бўлган. Трамп америкаликлар Эроннинг бир неча катерини чўктириб юборганини қўшимча қилган.

АҚШ ва Исроилнинг Эронга қарши уруши бошланганидан буён Доналд Трамп бир неча бор Теҳронга вайронкор оқибатлар билан таҳдид қилган. Хусусан, апрел ойи бошида у эронликлар Ҳўрмуз бўғозини очмайдиган бўлса, «жаҳаннам» ва «тамаддун ҳалокати» билан қўрқитганди. Шундан кўп вақт ўтмай, 8 апрел куни АҚШ Эрон билан вақтинчалик сулҳ тузди.

CNN ва Fox News телеканаллари «Озодлик лойиҳаси» шусиз ҳам мўрт бўлган ва бўғоз очилишини таъминлай олмаган вақтинчалик сулҳни хавф остида қолдиришини қайд этмоқда. Эрондагилар амалиёт ўт очишни тўхтатиш тартибини бузиш деб ҳисобланиши ва бўғозга кирадиган Америка кемаларига ҳужум қилинишидан огоҳлантирган.