Ўзбекистон-Қозоғистон чегарасида навбат юзага келди

Ўзбекистондаги «Навоий» ўтказиш пунктида рўйхатга олиш тизимида узилишлар юзага келгани сабабли фуқароларнинг бир қисми қўшни давлат ҳудудига киришни кутишга мажбур бўлган.

Фото: Kazinform

Қозоғистон Миллий хавфсизлик қўмитаси Чегара хизмати Ўзбекистон билан чегарадаги «Қоплонбек» ўтказиш пунктида одамлар тўпланиб қолгани ҳақида маълум қилди, деб хабар берди Kazinform.

Хабарга кўра, Ўзбекистондаги «Навоий» ўтказиш пунктида рўйхатга олиш тизимида узилишлар юзага келгани сабабли фуқароларнинг бир қисми қўшни давлат ҳудудига киришни кутишга мажбур бўлган.

Шу билан бирга, идора Қозоғистон томонидаги ўтказиш пункти одатдагидек ишлаётганини, чегарани кесиб ўтишга ҳеч қандай чеклов киритилмаганини таъкидлади.

“Қозоғистон томонида ўтказиш пункти одатдагидек ишламоқда, ҳеч қандай чеклов киритилмаган. Чегара вакиллари доирасида ҳамкорлик ташкил этилган. Ўзбекистон томони маълумотига кўра, носозликларни бартараф этиш ва ўтказиш пункти иш қобилиятини тиклаш бўйича чора-тадбирлар олиб борилмоқда”, дейилади Қозоғистон МХҚ хабарида.

Қозоғистонликлардан сафарларни режалаштиришда ушбу маълумотни инобатга олиш сўралган.