Ҳантавирус тарқалган кемадаги йўловчиларни эвакуация қилиш бошланди

Ҳантавирус тарқалиши қайд этилган MV Hondius круиз кемасидаги испаниялик йўловчиларнинг биринчи гуруҳи лайнер Тенерифе оролига етиб келгач, эвакуация қилинди. Бу ҳақда Испания Соғлиқни сақлаш вазирлигига таяниб The Guardian хабар берди. Хабарга кўра, 1 апрел куни Аргентинадан йўлга чиққан лайнер 10 май куни Тенерифега етиб келган.

Ҳукумат баёнотида айтилишича, эвакуация қилинган испанлар дастлаб Гранадиля портига олиб борилади. У ердан эса ҳарбий автобусларда аэропортга олиб келиниб, сўнгра Испания ҳукумати самолётида Мадридга эвакуация қилинади. Улар пойтахтда карантинга жойлаштирилади.

Reuters агентлигининг ёзишича, улардан кейин кемани нидерландияликлар гуруҳи тарк этади. Германия, Белгия ва грециялик сайёҳлар ҳам уларнинг самолётида олиб кетилади, деб маълум қилди Испания соғлиқни сақлаш вазири Моника Гарсия. Сўнгра Туркия, Франция, Буюк Британия ва АҚШ сайёҳлари кемани тарк этади.

«Операция доирасидаги охирги рейс Австралиядан келади. Бу энг мураккаб рейс, у эртага куннинг иккинчи ярмида етиб келади», — деди Гарсия.

Унинг қўшимча қилишича, бу рейсда Австралия, Янги Зеландия ва Осиёнинг бошқа мамлакатларидан олти нафар киши олиб кетилади.

Май ойи бошида Аргентинадан Кабо-Вердега кетаётган MV Hondius круиз кемасида ҳантавирус тарқалиши қайд этилган эди. Биринчи бемор Жанубий Америка бўйлаб саёҳат вақтида вирусни юқтириб олган. Вирус ташувчилари билан алоқа у қушларни кузатиш жойларига борганида содир бўлган.

Кема бортида 150 киши бўлган. Уларнинг асосий қисми АҚШ, Буюк Британия, Испания ва Нидерландия фуқароларидир.

ЖССТ маълумотига кўра, вирус тарқалиши билан боғлиқ саккизта ҳолат аниқланган бўлиб, уч нафар бемор вафот этган. Ҳантавирус – вирусларнинг бир тури бўлиб, у одамга асосан кемирувчиларнинг қуриган ахлати таркибидаги заррачалар билан нафас олиш орқали юқади.

Шунингдек, кемирувчилар тишлаши ёки тирнаши орқали тарқалиши мумкин.

У оғир респиратор касалликларни келтириб чиқаради. Одамдан одамга юқиши эса жуда кам учрайди.