АҚШ Россия нефти учун янги муддат берди

АҚШ Молия вазирлиги Россия нефтини денгиз орқали ташишга доир санкция истисноларини яна 30 кунга узайтирди. Бу қарор Россия нефтини харид қилиш учун қўшимча вақт сўраган бир қатор давлатлар мурожаатидан сўнг қабул қилинган.

Фото: AP

Бу ҳақда АҚШ молия вазири Скотт Бессент 18 май куни маълум қилди.

Унинг айтишича, янги 30 кунлик лицензия “энг заиф давлатларга ҳозирда денгизда бўлган Россия нефтидан вақтинча фойдаланиш имконини беради”.

Аввалроқ Reuters агентлиги манбага таяниб, бир нечта мамлакат Россия нефтини сотиб олиш учун қўшимча муддат сўраганидан кейин лицензияни узайтириш тўғрисида қарор қабул қилинганини хабар қилган эди.

АҚШ Молия вазирлигининг Россия нефти ва нефть маҳсулотларини денгиз танкерларида сотиб олишга рухсат берувчи аввалги лицензияси 16 май куни ўз кучини йўқотган.

Бундан аввал Скотт Бессент мазкур ҳужжат амал қилиш муддатини яна узайтиришни режалаштирмаётганини айтган эди.

АҚШ Россия нефти экспортига нисбатан енгилликларни 13 март куни жорий қилган. Бу қарор Эронга қарши уруш фонида энергия нархлари ошган бир пайтда қабул қилинган.

Дастлаб ушбу енгилликлар 30 кун — 11 апрелгача амал қилиши белгиланган эди. Ўша пайтда Бессент бу чорани “тор доирадаги ва қисқа муддатли” қарор деб атаган.

Кейинчалик АҚШ денгиз танкерларига юкланган Россия нефти ва нефть маҳсулотларини сотиш лицензиясини 16 майгача узайтирган.

The New York Times нашрининг хабар беришича, санкциялар юмшатилганидан кейин Россия нефть савдосидан ҳар куни қўшимча 100 миллион доллардан ортиқ даромад ола бошлаган.

International Energy Agency маълумотларига кўра, Россиянинг нефть савдосидан тушган даромади март ойида февралга нисбатан қарийб икки баробарга ошиб, 19 миллиард долларга етган.