АҚШдан кейин Британия ҳам Россия нефти бўйича лицензия берди

Буюк Британия ҳукумати сайтида эълон қилинган маълумотга кўра, лицензия дизель ёнилғиси ҳамда Россия нефтидан қайта ишланган авиация керосинини импорт қилишга рухсат беради. Ҳужжат муддатсиз амал қилади, бироқ вақти-вақти билан қайта кўриб чиқилиши белгиланган.

Reuters агентлигининг ёзишича, Эрондаги уруш ортидан Буюк Британияда ёнилғи нархларининг кескин ошиши ҳукуматга босимни кучайтирган. Расмий Лондон юқори яшаш харажатлари ва энергия ресурслари танқислиги муаммосини юмшатишга уринмоқда.

Британия ҳукумати қарори АҚШнинг шунга ўхшаш қадами ортидан қабул қилинди. 18 май куни Вашингтон Россия нефти ва нефть маҳсулотларини денгиз орқали санкцияларни айланиб ўтган ҳолда ташиш ва сотиш бўйича лицензияни узайтирган эди.

АҚШ Молия вазирлиги бу вақтинчалик лицензия Эрондаги уруш сабаб таъминот узилишидан энг кўп жабр кўрган давлатларни қўллаб-қувватлаш мақсадида жорий этилганини билдирган.

Шу билан бирга, Буюк Британия Россиядан суюлтирилган табиий газни денгиз орқали ташиш учун ҳам 2027 йил 1 январгача амал қиладиган лицензия берди.

Эслатиб ўтамиз, Буюк Британия 2022 йилда Россиянинг Украинага кенг кўламли босқинидан сўнг Россия нефти ва кўмири импортини тақиқлаган эди. 2025 йил октябрь ойида эса Россиянинг “соя флоти”га қарши кенг қамровли санкциялар пакети доирасида Россия нефтидан учинчи давлатларда ишлаб чиқарилган нефть маҳсулотлари импорти ҳам тақиқланганди.

Bloomberg агентлиги маълум қилишича, Эрон атрофидаги можаро ва нефть нархларининг ошиши фонида Россия нефть экспортидан тушаётган даромадлар Украинадаги уруш бошланганидан буён энг юқори даражага етган. 3 майгача бўлган даврда Россия нефть таъминотлари учун ҳафталик ўртача тушум 2,42 миллиард долларни ташкил этган.

Шунингдек, Ҳўрмуз бўғозидаги кескинлик ва блокада хавфи ортидан Вашингтон Россия нефти учун айрим бозорларни қайта очиб, санкцияларни юмшатгани қайд этилмоқда.