Зеленский: урушнинг “қайноқ босқичи” йил охиригача тугаши мумкин

Володимир Зеленский бу ҳақда АҚШнинг CBS телеканалидаги Face the Nation дастурига берган интервьюсида маълум қилди. Суҳбатдан парчалар Украина президентининг Telegram-каналида эълон қилинган.

Зеленскийнинг сўзларига кўра, 2025 йил декабридан бошлаб Россия фронтдаги ташаббусни аста-секин йўқота бошлаган.

“Январь ойида америкалик ҳамкорларимизга музокаралар учун имконият ойнаси очилганини айтганман. Чунки ҳар ой ўтган сайин Россия кўпроқ жонли куч йўқотади”, — деди Украина раҳбари.

Унинг таъкидлашича, ҳозирда Украина бир ой давомида озод қилаётган ҳудудлар ҳажми Россия эгаллаётган ҳудудлардан кўпроқни ташкил этмоқда.

“Шунинг учун мен келаси қиш бошлангунча дипломатик ечим топиш, музокара столи атрофида ўтириб гаплашиш керак, деб ҳисоблайман”, — деди Зеленский.

Унинг фикрича, бу Россия жамияти томонидан Путинга бўладиган ички босим, шунингдек, АҚШ ва Европа давлатларининг Москвага нисбатан санкцион босимига боғлиқ.

Зеленский Европа томонидан музокараларда иштирок этиши мумкин бўлган вакил сифатида Буюк Британия, Франция ва Германиядан иборат “Европа учлиги”ни таклиф қилди.

Шу билан бирга, у Шимолий Европа давлатларини ҳам Украинанинг ишончли ҳамкорлари сифатида қайд этди. Президент Туркиянинг воситачилик қилишга бўлган интилишини ҳам юқори баҳолади.

“Туркия ҳар доим воситачи бўлишни истаган ва унинг ёрдамида ҳарбий асирларимизни қайтариш борасида муайян натижаларга эришдик”, — деди у.

Украина раҳбарига кўра, якуний қарор Киев ва Европа томонидан қабул қилиниши лозим. Бироқ Россия ҳам мулоқотга ва Европа иштирокидаги музокараларга тайёр бўлиши муҳим аҳамиятга эга.

Аввалроқ The Economist журнали ҳукумат манбаларига таяниб, Зеленский мамлакатни яна икки-уч йиллик урушга тайёрлаш бўйича кўрсатма берганини ёзган эди. Нашр фикрича, АҚШ иштирокидаги сўнгги музокараларнинг натижа бермагани туфайли можаро томонлардан бири заифлашгунига қадар давом этиши мумкин.

Бироқ “РБК-Украина” агентлигининг Украина ҳукуматидаги манбаси бу маълумотни рад этди ва уни “эски ахборот” деб атади.

Манбага кўра, Зеленский доимий равишда Россияга ўт очишни тўхтатиш таклифини билдириб келмоқда. Шунингдек, у яқинда урушнинг “қайноқ босқичи” 2026 йил ноябрь ойига қадар якунланиши мумкинлигига ишора қилган. Бу ҳақда Украина Олий радаси депутати Ольга Василевская-Смаглюк маълум қилган.