Доҳада якунланган музокаралар ва Киев бўйлаб оммавий ҳужум – кун дайжести

Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.

АҚШ—Эрон музокаралари

Чоршанба куни Эрон ва АҚШ билвосита музокараларнинг навбатдаги раундини якунлади. Бироқ томонлар ўртасида мустаҳкам тинчлик сари бирор бир силжиш бўлганидан дарак йўқ.

Ҳар икки мамлакат вакиллари Доҳада икки кун давомида Ҳўрмуз бўғозидаги денгиз қатнови ва Эроннинг музлатилган маблағларини очиш масалаларини муҳокама қилган. Бу икки масала дастлабки келишувнинг энг муҳим бандларидан ҳисобланади.

Reutersʼнинг Эрондаги манбаларига кўра, Теҳрон ҳатто куч ишлатиш эвазига бўлса ҳам Ҳўрмуз бўғози устидан ўз назоратини халқаро миқёсда тан олдиришга қарор қилган. Шунингдек, Эрон дастлабки келишувда белгиланган божсиз давр тугагач, август ўрталаридан бошлаб кемалар қатновидан бож ундира бошлашини бир неча бор таъкидлаган.

Навбатдаги учрашув Эроннинг марҳум Олий раҳбари Али Хоминаийни дафн этиш маросимларидан кейин бўлади. У 9 июл куни дафн этилиши режалаштирилган.

Вашингтонда эса АҚШ президенти Доналд Трамп икки томон Эрон ядро дастурига қўйилиши мумкин бўлган чекловлар борасида прогрессга эришаётганини айтди: «Эронни ядросизлантириш жараёни яхши кетмоқда. Улар жуда яхши учрашувлар ўтказишди, буёғини кўрамиз», деди у журналистларга.

Бироқ Reuters манбаларига кўра, техник характерга эга бўлган ушбу музокараларда ядро дастури умуман тилга олинмаган. Оқ уй томонидан юборилган Трампнинг куёви Жаред Кушнер ва махсус вакил Стив Уиткофф ушбу йиғилишларда қатнашмаган.

Томонларнинг ҳеч бири мавжуд келишмовчиликларни бартараф этишга муваффақ бўлингани ёки йўқлиги ҳақида гапирмади.

Қатар ташқи ишлар вазирлиги эса ушбу муҳокамалар — «июн ойидаги меморандум билан боғлиқ масалаларда ʼижобий силжишʼ бергани»ни маълум қилди.

Россия—Украина уруши

Россия кучлари пайшанбага ўтар кечаси Украина пойтахти Киевга ҳужум уюштирди. Дронлар ва ракеталар турар жой биноларига зарба бериши оқибатида камида 10 киши ҳалок бўлди, элликдан ортиқ киши жароҳатланди.

Пойтахт ҳарбий администрацияси раҳбари Тимур Ткаченко ҳужумлар оқибатида шаҳар бўйлаб 36 га яқин объектга зарар етганини билдирди. У қўшимча тафсилотларни очиқламади.

Киев мэри Виталий Кличконинг алоҳида ёзишича, яна 34 киши жароҳатланган. Тўғридан тўғри зарба оқибатида кўп қаватли уйнинг олтинчи қаватигача бўлган қисми қулаб тушган.

Интернетда жойлаштирилган суратларда марказий кўчадаги бинода назоратсиз ёнғин содир бўлаётгани, шаҳарнинг бошқа жойларида эса деразалар синиб кетгани ва автомобиллар яксон бўлгани акс этган. Гувоҳларнинг сўзларига кўра, Киевда бир нечта портлаш товушлари эшитилган.

Россия ҳам Украина ҳужумлари ҳақида хабар берди. Хусусан, мудофаа вазирлиги пайшанба тонгига қадар Украинанинг 327 дрони уриб туширилганини маълум қилди.

Россиянинг Белгород вилоятида эса дрон турар жой биносига урилиши оқибатида бир эркак ҳалок бўлган. Унинг рафиқаси жароҳатланди.

Украина сўнгги пайтларда Россия ҳудуди ичкарисига зарбаларни кучайтирмоқда. Бу дунёдаги учинчи йирик нефт ишлаб чиқарувчи давлатда кенг кўламли ёқилғи инқирозини келтириб чиқарди.

Венесуэлада зилзила қурбонлари ортмоқда

Венесуэлада содир бўлган иккита зилзила оқибатида ҳалок бўлганлар сони 2295 кишига етди. Бундан ташқари, айни пайтда 11 267 нафар инсон жароҳатланган ва қарийб 13 минг киши бошпанасиз қолган.

БМТ қарийб 50 минг кишини бедарак йўқолган деб ҳисобламоқда. Расмийларга кўра, улардан 30 мингга яқини энг кўп жабр кўрган Ла-Гуайра шаҳрининг порт зонасида бўлган.

Қутқарувчилар у ерда вайроналар остидан қарийб 6,5 минг кишини қутқариб олган. Аммо омон қолганлар сони 20 минг кишига етиши мумкин, чунки кўпчилик мустақил равишда ёки яқинларининг ёрдами билан чиқиб олишга муваффақ бўлгани айтилмоқда.

Шунингдек, 1 июл куни иорданиялик қутқарувчилар 3 ёшли болани вайроналар орасидан тирик ҳолда олиб чиқди. Болакай зилзиладан 6 кун ўтиб тирик қолиши ҳақиқий мўъжиза ўлароқ кутиб олинди ва қутқарув ишларини давом эттиришда умид уйғотди.

Шунингдек, кеча Венесуэла президенти вазифасини бажарувчи Делси Родригес миллий етти кунлик мотам эълон қилди. «Вайронкор зилзилалар келтириб чиқарган инсоний қурбонлар туфайли Венесуэла қалби қайғудан эзилмоқда», деб ёзди Родригес.

24 июн куни Венесуэла шимолида 39 сония фарқ билан 7,2 ва 7,5 магнитудали иккита зилзила содир бўлди — бу мамлакатда охирги 125 йилдаги энг кучли ер силкинишларидир. Улардан кейин ўнлаб афтершоклар кузатилди. Оқибатда минглаб уйлар қулаб тушди.

Буркина Фасода қуролли ҳужум

Буркина Фасо армияси 30 июн куни қуролли гуруҳларнинг мувофиқлаштирилган ҳужумларини қайтарганини маълум қилди. Армия ҳаво зарбалари билан қўллаб-қувватланган қарши ҳужумлар давомида 400 дан ортиқ ҳужумчини йўқ қилган.

Баёнотда айтилишича, ҳужумлар Сирба ва Липтако вилоятларидаги аҳоли пунктларида жойлашган ҳарбий позицияларга қаратилган.

Армия жанглар пайтида ўзининг уч нафар ҳарбий хизматчиси ҳалок бўлганини маълум қилди. Шунингдек, қўшинлар аҳолини хавфсизлик кучлари билан фаол ҳамкорлик қилишга ва шубҳали шахслар ҳақида зудлик билан хабар беришга чақирди.

Африка ғарбида жойлашган ушбу давлат бир неча кун олдин Франция билан дипломатик муносабатларни узишга қарор қилганди. Баёнотда мувофиқлаштирилган ҳужумлар айнан ушбу қарор билан боғланган. Армия баёнотида Франция ушбу қуролли гуруҳларни қўллаб-қувватлаётгани даъво қилинади, лекин далил келтирилмаган.

Мексикада мухлислар фожиаси

Мексикада миллий жамоанинг Жаҳон чемпионатидаги ғалабасидан кейинги тантаналар пайтида тўрт киши ҳалок бўлди.

Соғлиқни сақлаш органларининг билдиришича, қурбонлардан уч нафари — икки аёл ва бир эркак ҳаво етишмовчилигидан бўғилиш оқибатида вафот этган. Яна бир қурбон эса тутқаноқ хуружи сабабли шифохонага юборилган 30 ёшли эркак бўлган.

Пойтахт Мехико мэри Клара Бругада қурбонларнинг оила аъзоларига таъзия билдирди ва унинг администрацияси суриштирув ишларида тўлиқ ёрдам беришини ваъда қилди.

Ҳукуматнинг маълум қилишича, Мексика Эквадор устидан 2:0 ҳисобида ғалаба қозонган ўйиндан сўнг 1,4 миллионгача одам кўчаларга чиққан. Мухлисларнинг мутлақ кўпчилиги шаҳарнинг марказий хиёбонида тўпланиб қолган.

Катта тиқилинчда қурбонлардан ташқари 1615 кишига тиббий ёрдам кўрсатилган, ўнлаб одамлар шифохонага юборилган.