Электромобилларда энг кўп учрайдиган носозликлар маълум қилинди

Британияликлар электромобиллар билан боғлиқ носозликлар статистикасини ўрганиб, уларнинг эгаси аслида нимадан хавотирланиши кераклигини аниқлади.

Электромобил эгалари аккумуляторнинг қимматбаҳо носозлигидан кўра, кўпроқ оддий механик ва электр носозликларига дуч келади. Бу ҳақда Carscoops нашри Warrantywise компанияси тадқиқотига таяниб хабар берди. Тадқиқот британияликларнинг кафолат бўйича қилган мурожаатларига асосланган.

Тадқиқотга кўра, электромобилларда кўпинча ички ёнув двигателли машиналарда ҳам мавжуд бўлган қисмлар ишдан чиқади. Хусусан, носозликлар сони бўйича электр жиҳозлари, жумладан, датчиклар ва марказий қулфлаш тизими етакчилик қилмоқда. Таъмирлаш ишлари ўртача 1085–1205 долларга тушмоқда.

Подвеска қисмлари, айниқса, ричаглар ҳам тез-тез ишдан чиқяпти. Муаммо сабабларидан бири – электромобилларнинг вазни оғирлигидир. Ўртача ҳисобда носозликни бартараф этиш 1600 долларга баҳоланмоқда.

Электромобилларга хос бўлган муаммолар орасида ўрнатилган зарядлаш қурилмасининг бузилиши ҳам бор. Уни таъмирлаш ўртача 2890 доллар турса-да, энг катта даъво суммаси 14 000 долларни ташкил этган.

Тортиш аккумуляторларига келсак, улар камдан-кам ҳолларда ишдан чиқади. Муаммо юзага келган тақдирда, харажатлар ўртача 8570 долларни ташкил этади.

Warrantywise таҳлилчиларининг ҳисоб-китобларига кўра, 2024 йилдан 2025 йилгача бўлган даврда электромобилларни таъмирлашнинг ўртача нархи 10,7 фоизга ошган.