Hindistonda Tadbirkorlik institutini egallab olgan terrorchilar yo‘q qilindi

Hindiston armiyasi uch kun avval Tadbirkorlikni rivojlantirish davlat institutiga joylashib olgan 2 nafar jangarini yo‘q qilish bo‘yicha amaliyotni yakunladi. Maxsus amaliyot shimoliy Jammu va Kashmir shtati ma'muriy markazi Srinagar shahridan 15 km masofada o‘tkazilgan, deb xabar qilmoqda NDTV telekanali.

Ma'lumotlarga ko‘ra, jangarilardan biri 11 oktabrda o‘ldirilgan. Dastlab, maxsus kuchlar binoda 3 nafar ekstremist borligini taxmin qilgan. Amaliyot chog‘ida bir harbiy xizmatchi yaralangan. 

Xabarlarga binoan, jangarilar qayiqda Pokiston hududidan Jyelam daryosini suzib o‘tib, institut binosini egallab olishgan. Xavfsizlik kuchlari zudlik bilan ularning g‘arazli rejalarini to‘sishgan. Bundan avval, fevral oyida ham ekstremistlar ushbu binoni egallashga urinishgan edi.