O‘zbekiston hukumati respublika hududlarida ishsiz fuqarolarni kasb-hunarga o‘qitish markazlarini tashkil etish chora-tadbirlari to‘g‘risidagi qarorini e'lon qildi. Ushbu qarorga ko‘ra, 2017-2020 yillar davomida ishsiz fuqarolarni professional qayta tayyorlash va kasb-hunarga o‘qitish markazlari tashkil etiladi.
Vazirlar Mahkamasi qarori ishsiz fuqarolarni kasb-hunarga qayta tayyorlashni samarali tashkil etish hamda mehnat bozorida talab yuqori bo‘lgan yangi kasb-hunar va mutaxassisliklarga ega bo‘lish uchun ularga tegishli shart-sharoitlar yaratish maqsadida qabul qilingan.
Yangi o‘quv markazlari davlat ta'lim muassasalari hisoblanib, ular Mehnat vazirligiga bo‘ysunadi. Ishsiz fuqarolarga 6 oy mobaynida eng kam ish haqi miqdorida stipendiya tayinlanadi. Yangi o‘quv markazlarda ko‘pi bilan 1 yil davomida ta'lim olish mumkin, eng uzoq stipendiya olib o‘qish davri — 6 oy.
Bu markazlarda tashkilot va muassasalar buyurtmalariga qarab, pullik, qisqa muddatli o‘quv — tayyorlov kurslari ham tashkil qilinishi nazarda tutilgan.
Qarorda aytilishicha, respublika bo‘ylab 11ta shunday markaz tashkil etiladi. Markazlar Nukus, Andijon, Buxoro, Jizzax, Navoiy, Namangan, Guliston, Termiz, Qo‘qon, To‘ytepa va Urganch shaharlarida joylashadi. Markazlarning har birida 240 nafardan o‘quvchi uchun o‘rin bo‘ladi.
Markazlarni moliyalashtirish manbalari - Bandlikka ko‘maklashish davlat jamg‘armasi, donor mamlakatlar grantlari, xalqaro moliya tashkilotlarining imtiyozli kreditlari hamda Koreya Respublikasi hukumati granti (Qo‘qon va Urganch shaharlarida) hisoblanadi.
Shuningdek, Toshkent, Samarqand va Shahrisabz shaharlaridagi Ishsiz fuqarolarni kasb-hunarga o‘qitish markazlarining tuzilmalari Vazirlar Mahkamasining alohida qarorlari bilan tasdiqlangan.
«Toshkent va Samarqand shaharlarida ishsiz fuqarolarni, shu jumladan ta'lim muassasalari bitiruvchilarini qayta tayyorlash va ularning malakasini oshirish bo‘yicha kasb-hunarga o‘qitish markazlari tashkil etilganligi va samarali faoliyat yuritayotganligi, «Shahrisabz shahrida kasb-hunarga o‘qitish markazini tashkil etish va O‘zbekistonda kasb-hunarga o‘qitish salohiyatini oshirish bo‘yicha konsalting» loyihasi amalga oshirilayotganligi ma'lumot uchun qabul qilinsin», deyilgan qaror matnida.
Nukus (2018 — 2020 yillar)
1. Elektr va elektronika.
2. Axborot texnologiyalari.
3. Baliq yetishtirish va baliq mahsulotlarini qayta ishlash texnologiyasi.
