Davlat mulkining qaysi obektlari hokimiyatlar qaroriga ko‘ra xususiylashtiriladi?

Prezidentning 16.06.2017 yildagi PQ–3067-son «Davlat mulki obektlarini sotish tartib-taomillarini yanada takomillashtirish chora-tadbirlari to‘g‘risida»gi qarori imzolandi. Bu haqda davlat rahbarining matbuot xizmati xabar qildi, deb yozmoqda Norma.uz.

Qabul qilingan qarorda ta'kidlanishicha, Vazirlar Mahkamasi, Davlat raqobat qo‘mitasi vazirliklar, idoralar, xo‘jalik birlashmalari, Qoraqalpog‘iston Respublikasi Vazirlar Kengashi, viloyatlar va Toshkent shahri hokimlari bilan hamkorlikda obektlar toifalarining to‘liq xatlovi o‘tkazildi.

Xatlov natijalariga ko‘ra quyidagilar tasdiqlandi:

•  xususiylashtirilmaydigan davlat mulki strategik obektlarining yagona ro‘yxati;

•  Prezident va Hukumat qarorlariga binoan davlat tasarrufidan chiqariladigan va xususiylashtiriladigan davlat mulki obektlari ro‘yxati;

•  Qoraqalpog‘iston Respublikasi Vazirlar Kengashining raisi, viloyatlar va Toshkent shahri hokimlari tomonidan xususiylashtirish to‘g‘risidagi qarorlar qabul qilinadigan davlat mulki obektlari ro‘yxatini aniqlash mezonlari.

Davlat mulkining nostrategik obektlarini xususiylashtirish bo‘yicha takliflar va arizalar keyinchalik hokimlar tomonidan ma'qullanishidan oldin 6.10.2014 yildagi 279-son VMQga muvofiq tuzilgan hududiy tanlov komissiyalari tomonidan ko‘rib chiqiladi.

Ijobiy qaror quyidagi obektlar toifasiga nisbatan qabul qilinishi mumkin:

1)  bino va inshootlarining umumiy egallagan maydoni 2000 kv.m.gacha bo‘lgan davlat mulkining bo‘sh turgan yoki foydalanilmayotgan obektlari;

2)  bino va inshootlarining umumiy egallagan maydoni 2000 kv.m.gacha bo‘lgan qurilishi tugatilmagan, tugatilishi uchun moliyaviy manbasi bo‘lmagan obektlari;

3)  bino va inshootlarining umumiy egallagan maydoni 2000 kv.m.gacha bo‘lgan tugatilish jarayonida sotilmagan va mahalliy ijroiya hokimiyati organlariga berilgan obektlar;

4)  xo‘jalik jamiyatlari yoki boshqa tashkilotlardagi davlat ulushlari (aksiyalari):

- asosiy fondlarining balans qiymati EKIHning 50 ming barobaridan oshmagan;

- xodimlarining o‘rtacha yillik soni 500 kishidan oshmagan.

Bunda Toshkent shahridagi obektlarning xususiylashtirilishi Vazirlar Mahkamasining tegishli Komplekslari bilan kelishilishi zarur, davlat organlarining hududiy bo‘linmalariga biriktirilgan obektlar (butun respublika bo‘yicha)ning xususiylashtirilishi yuqori turuvchi respublika organlarining roziligi bilan amalga oshiriladi.