Prezident Zulfiya mukofoti sohibasini uyushmaga rais etib tayinladi

O‘zbekiston yoshlar ittifoqi tarkibida Yosh ijodkorlar uyushmasi tashkil etildi. Zulfiya nomidagi Davlat mukofoti sohibasi, O‘zbekiston Jahon tillari universiteti talabasi Mehrinoz Abbosova ushbu uyushmaga rais etib tayinlangan.

Mehrinoz Abbosova oy boshida «Kamolot» yoshlar ijtimoiy harakatining IV qurultoyida chiqish qilgan va shu chiqishi tufayli prezident e'tiboriga tushgandi. Abbosova Shavkat Mirziyoyevning taklifi bilan ushbu lavozimga tayinlandi.

«Prezidentimizning Toshkent shahrining Yunusobod mavzesida faol yoshlar vakillari bilan uchrashuvi yoshlarimizning chin ma'nodagi suyanchi va tayanchi sifatida qayta tashkil etilgan O‘zbekiston yoshlar ittifoqi faoliyat mexanizmini yangicha quvvat bilan  mustahkamlovchi tuzilmalar joriy etish bo‘yicha amaliy qadamlarga asos bo‘ldi.

Ijodkor yoshlar uyushmasining raisi etib Zulfiya nomidagi Davlat mukofoti sohibasi, O‘zbekiston Jahon tillari universiteti talabasi Mehrinoz Abbosova rais etib tayinlandi», deyilgan Namnews.uz xabarida.

Eslatib o‘tamiz, «Kamolot» qurultoyidan keyin prezident 23 yoshli Alisher Sa'dullayevni Xalq ta'limi vaziriga o‘rinbosar, 25 yoshli Olim To‘ychiyevni O‘zbekiston Respublikasi Fan va texnologiyalar agentligi bosh direktorining o‘rinbosari etib tayinlagandi.