Oila va xotin-qizlar qo‘mitasi yana bir yo‘nalish uchun «Zulfiya» mukofotini berishni taklif qildi

Oila va xotin-qizlar qo‘mitasi Zulfiya nomidagi davlat mukofotini tibbiyot sohasi uchun alohida yo‘nalish sifatida berishni nazarda tutuvchi prezident farmoni loyihasini e’lon qildi.

Ushbu loyiha qabul qilinishi natijasida tibbiyot yo‘nalishida alohida yutuqlarga erishgan iqtidorli xotin-qizlarni Zulfiya nomidagi davlat mukofoti bilan taqdirlab borish yo‘lga qo‘yiladi.

Loyihada, jumladan, 1999 yil 10 iyundagi «Zulfiya nomidagi Davlat mukofotini ta’sis etish bo‘yicha takliflarni qo‘llab-quvvatlash to‘g‘risida»gi farmonga tegishli o‘zgartirishlarni kiritish hamda davlat mukofoti bilan taqdirlab borish bilan bog‘liq xarajatlarning moliyalashtirish manbalarini belgilash kabi masalalar hal qilingan.

Oila va xotin-qizlar qo‘mitasiga uch oy muddatda qonunchilik hujjatlariga ushbu farmondan kelib chiqadigan o‘zgartirish va qo‘shimchalar to‘g‘risida hukumatga takliflar kiritishi belgilanmoqda.