Erdo‘g‘an Iroq Kurdistoniga tahdid qildi

Iroq Kurdistonidagi mustaqillik bo‘yicha referendumni qo‘llab-quvvatlagan Isroil qo‘shni davlatlar tomonidan blokada amalga oshiriladigan bo‘lsa, unga yordam bera olmaydi, deya ma'lum qildi Turkiya prezidenti Toyyib Erdo‘g‘an seshanba kuni.

Referendum dushanba kuni bo‘lib o‘tdi. 9 foiz byulletenlar hisob-kitobiga ko‘ra, 93 foiz ishtirokchilar mintaqaning mustaqilligi uchun ovoz berishgan. Rasmiy yakunlar payshanba kuni e'lon qilinadi.

"Referendumni kim qo‘llab-quvvatladi, kim natijalarni tan olmoqda? Birgina Isroil. Xo‘sh, nima qilibdi? Kosovoni o‘nlab davlatlar tan oldi, biroq u haligacha davlat bo‘la olgani yo‘q. Isroilning tan olishi nima beradi? Referendum o‘tkazish bilan ish hal bo‘ladi, deb o‘ylaysizlarmi? Biz sanksiyalarni joriy etishni boshlashimiz bilan, neft jo‘mragini burab qo‘yishimiz bilan – hammasi tugaydi. Barcha daromadlar to‘xtaydi. Shimoliy Iroqqa yuk mashinalari qatnashni bas qilsa, u yerda iste'mol qilish uchun yaroqli hech narsa qolmaydi. Isroil ularga nimanidir qanday yetkazib beradi? Marhamat, urinib ko‘rsin", - dedi Erdo‘g‘an Anqaradagi oliy o‘quv yurtlari o‘qituvchilari oldida chiqish qilib.

Avvalroq Erdo‘g‘an kurdlar mustaqilligiga neft bo‘yicha cheklovlar bilan javob qaytarmoqchi ekani xabar berilgandi.