Shifokorlarning malakasini oshirishda chet ellik mutaxassislar tajribasi o‘rganiladi

O‘zbekistonda shifokorlar malakasini oshirish va ularni qayta tayyorlash tizimi tubdan o‘zgardi. Bu haqida Sog‘liqni saqlash vazirligining mutasaddi xodimlari 27 sentabr kuni tibbiy ta'limni isloh qilishga bag‘ishlangan matbuot anjumanida ma'lum qilishdi. 

Tadbirda qatnashgan KUN.UZ muxbirining xabar berishicha, tibbiyot xodimlarining malakasini oshirish va ularni qayta tayyorlash tizimida integratsiya paydo bo‘lgan, bugungi kunda ular xorijda yuqori texnologiyali operatsiyalarda ishtirok etish imkoniga ega bo‘lishmoqda. 

Ma'lumotlarga ko‘ra, 2017 yilda 192 nafar tibbiyot xodimi malaka oshirish uchun chet ellarga yuborilgan. 300 nafarga yaqin chet ellik mutaxassis O‘zbekistonga kelib, mahorat darslari va seminarlar o‘tkazishi yo‘lga qo‘yilgan. Bu yo‘nalishda maxsus fond ham tashkil etilgan. 

Anjumanda qator tibbiy ta'lim muassasalari rahbarlari xorijiy safarlarda bo‘lib, tegishli memorandumlarni imzolashgani ma'lum qilindi. Jumladan, Toshkent davlat stomatologiya instituti rektori Janubiy Koreyada bo‘lib, o‘z yo‘nalishi bo‘yicha memorandum imzolab qaytgani ta'kidlandi. 

Shuningdek, taniqli shifokor Leo Bokeriya, professor Davidovlar O‘zbekistonga kelib, bir necha jarrohlik operatsiyalarini o‘tkazishdi. Bularning bari o‘quv jarayonlariga o‘z ta'sirini o‘tkazadi, deya ta'kidlashmoqda sog‘liqni saqlash tizimi xodimlari. 

Bundan tashqari, O‘zbekistonda Simulyatsiya markazi tashkil qilinishi haqida xabar berildi. Bu borada Tatariston bilan hamkorlik qilinadi, zero u yerda Simulyatsiya markazi faoliyati yaxshi yo‘lga qo‘yilgan. 

28 sentabr kuni Brass universiteti professorining tashrifi kutilmoqda. Professor bir oy davomida O‘zbekistonda bo‘ladi va o‘z tajribasi bilan o‘rtoqlashadi. 

Tadbirda, shuningdek, ilmiy-pedagogik kadrlar tizimiga ham katta ahamiyat qaratilayotgani ta'kidlandi. 

Shu o‘rinda savol tug‘ildi: Chet ellik mutaxassislarni jalb qilish xarajatlari davlat tomonidan amalga oshiriladimi yoki OTM tomonidanmi? Mutaxassislarning javoblariga ko‘ra, bu yo‘nalishda yangi fond tashkil etilgan, davlat tomonidan muayyan miqdordagi pul ajratiladi (masalan, 2017 yilda davlat tomonidan 3 milliard dollar miqdoridagi pul ajratildi), bundan tashqari, homiy tashkilotlar bor - ular ham bu borada yordam ko‘rsatib keladi, xarajatlar tibbiyot oliy ta'lim muassasalari tomonidan qoplanmaydi.