22:40 / 26.12.2017
22053
Сайлов участкаларидаги қоида бузилишлари тан олинди

24 декабрь куни Тошкент шаҳрида​ ўтказилган Халқ депутатлари туман Кенгашлари аъзоларини сайлаш жараёнида йўл қўйилган хатолар ҳақида «​Сайловдаги кўзбўямачилик: кимга овоз берилиши олдиндан маълум!»​ номли мақоласида сўз юритилганди. Учтепа туман сайлов комиссиясининг Kun.uz'га маълум қилишича, ҳақиқатан, 10-Заковат сайлов округига қарашли 24-сайлов участкасида айрим сайловчиларнинг оилавий овоз бериш жараёнлари аниқланган.

«24-сайлов участкасида айрим сайловчилар томонидан оилавий овоз бериш​ ҳолатлари кузатилган. «Халқ депутатлари вилоят, туман ва шаҳар Кенгашларига сайлов тўғрисида»ги Ўзбекистон Республикаси Қонунининг​ 41-моддасига мувофиқ, «​Сайлов чоғида йўл қўйилиб, оқибат натижада овоз бериш якунларига таъсир қилган қоидабузарлик туфайли сайлов умуман вилоят, туман, шаҳар бўйича ёки айрим сайлов округлари, ёхуд айрим сайлов участкалари бўйича ўтмаган деб топилиши мумкин»​. ​Сайлов участкасида ёзиб олинган видео лавҳалар таҳлил этилиб, ҳақиқатан оилавий овоз бериш ҳолати оз сонли сайловчиларда кузатилгани сабабли, овоз бериш жараёнининг якуний натижасига таъсир қилмагани ўрганиб чиқилди», дейди Учтепа туман сайлов комиссияси раиси Ғ. Рахимов.

Маълум қилинишича, мажлисда 10-Заковат сайлов округига қарашли 24-сайлов участкасида йўл қўйилган хатолар алоҳида таъкидланиб, ушбу сайлов участкаси аъзолари тегишли тартибда огоҳлантирилган.

Ушбу ҳолат юзасидан тумандаги бошқа участка сайлов комиссиялари фаолияти ҳам ўрганиб чиқилган. Шунингдек, «Халқ депутатлари вилоят, туман ва шаҳар Кенгашларига сайлов тўғрисида»ги Ўзбекистон Республикаси Қонунининг 42-моддасига биноан, тумандаги 18та сайлов округида келгуси икки ҳафтада такрорий овоз бериш ўтказилиши белгиланган. Такрорий овоз бериш жараёнини ўтказишда қайд этилган камчиликларни бартараф этиш юзасидан барча участка сайлов комиссия аъзоларига тегишли тавсиялар берилган.

Top