Iroq Saudiya Arabistoni bilan chegarada IShIDga qarshi amaliyot boshladi

Iroq armiyasi Saudiya Arabistoni bilan chegara yaqinidagi sahroni IShID terrorchilik guruhi jangarilaridan tozalash bo‘yicha amaliyotni boshladi. Bu haqda mamlakat qurolli kuchlarining Anbar g‘arbiy viloyatidagi qo‘mondoni general-mayor Mahmud al-Falahiy mahalliy Al Sumaria telekanaliga ma'lum qildi.

"Armiya, politsiya va qabilalardan bo‘lgan ko‘ngillilar bo‘linmalari, shuningdek, chegaraoldi qo‘shinlari mamlakat harbiy-havo kuchlari hamda xalqaro koalitsiya qo‘llab-quvvatlovi bilan bugun ertalab Anbar sahrosini Iroq-Saudiya Arabiston chegarasi yaqinida terrorchilardan tozalash bo‘yicha keng ko‘lamli amaliyot boshladi", - deya xabar bergan harbiy qo‘mondon.

Uning ta'kidlashicha, harbiy harakatlardan ko‘zlangan maqsad – sahroda qolayotgan terrorchilar boshpanasini yo‘q qilish.