Ироқ Саудия Арабистони билан чегарада ИШИДга қарши амалиёт бошлади

Ироқ армияси Саудия Арабистони билан чегара яқинидаги саҳрони ИШИД террорчилик гуруҳи жангариларидан тозалаш бўйича амалиётни бошлади. Бу ҳақда мамлакат қуролли кучларининг Анбар ғарбий вилоятидаги қўмондони генерал-майор Маҳмуд ал-Фалаҳий маҳаллий Al Sumaria телеканалига маълум қилди.

"Армия, полиция ва қабилалардан бўлган кўнгиллилар бўлинмалари, шунингдек, чегараолди қўшинлари мамлакат ҳарбий-ҳаво кучлари ҳамда халқаро коалиция қўллаб-қувватлови билан бугун эрталаб Анбар саҳросини Ироқ-Саудия Арабистон чегараси яқинида террорчилардан тозалаш бўйича кенг кўламли амалиёт бошлади", - дея хабар берган ҳарбий қўмондон.

Унинг таъкидлашича, ҳарбий ҳаракатлардан кўзланган мақсад – саҳрода қолаётган террорчилар бошпанасини йўқ қилиш.