Do‘ppisi qolib, boshini qo‘shib keladigan davr o‘tdimi? Bu savol nogahon o‘y surib o‘tirgan jurnalistning xayoliga birdan kelmadi. Gap shundaki, islohotlar shamoli diyorimizga «yangi bahori» iforini olib kirayotgan bir paytda, ayrim masalalar o‘z yechimini topmay qolaverishi dilni xufton qiladi. So‘z mamlakatdagi vijdon erkinligi xususida bormoqda. Avvalo, kishining e'tiqodi va iymoni, bir dinga mansubligi va o‘sha e'tiqodida muqim bo‘lishi haqida.
Yaratganga ming shukrlar bo‘lsinki, yangi davr keldi, «diniy bag‘rikenglik va vijdon erkinligi» deya qo‘l urilgan o‘zgarishlar minglab yurtdoshlarimizga cheksiz xursandchilik olib kelmoqda. Ammo, qonunchilik bilan belgilanmagan ikki vaziyat O‘zbekistondagi musulmonlarni ko‘nglini ranjitadi. Bu - yigitlarning soqol, qizlarning ro‘mol o‘rashiga qo‘yilgan «norasmiy» taqiq. Uni kim va nega joriy etganini hech kim bilmaydi, biroq amalda taqiqning ijrosi a'lo darajada bajariladi.
Ro‘mol masalasida alohida maqola orqali umumiy kamchilikni ko‘rsatib berishga harakat qilgandik. Bu gal, soqol qo‘ygani uchun yakuniy imtihonlarini topshirolmay, universitet darslariga kiritilmagan talabaning murojaati har ikki mavzuga qaytadan nazar tashlashga undadi.
Ma'lum qilinishicha, Jahon iqtisodiyoti va diplomatiya universiteti Xalqaro munosabatlar fakulteti 4-bosqich talabasi Farrux Absattarov «soqoli o‘sgani» vaji bilan yakuniy nazorat ishlarini topshirishga qo‘yilmayapti. Talaba universitetdagi darslarga ham kiritilmagan.
«Universitet hududida yurish axloq-odob qoidalari tuzilgan bo‘lib, ichki tartib nizom bilan ushbu qoidalar tasdiqlangan. Soqol va ro‘molga qarshi asosiy cheklovning huquqiy asosi mana shu nizom asosida shakllantirilgan. Ammo, o‘sha nizomning o‘zi Inson huquqlari umumjahon deklaratsiyasi, O‘zbekiston Respublikasi Konstitutsiyasi, «Vijdon erkinligi va diniy tashkilotlar to‘g‘risida»gi qonun va bir nechta qonunosti hujjatlarda ko‘rsatilgan insonning uzviy huquqlariga zid. Masala yuzasidan rektoratga bir necha marta murojaat etganimga qaramay, yuqori turuvchi qonunlar asosida ish ko‘rilmaydi», deydi Farrux.
Tabiiy savol paydo bo‘ladi: ta'limda soqol qo‘yishning, ro‘mol o‘rashning qanday salbiy jihati bor? Balki, maxsus gigiyenik intizomni talab etadigan bilim yurtlari haqida so‘z ketganda, fikrni asoslash uchun bahona topish mumkin bo‘lardi. Ammo, Jahon iqtisodiyoti va diplomatiya universitetida talabaning soqoli unga qanday xalaqit berishi mumkin?! Ushbu savollarga javob izlab, oliygoh ostonasiga borgan Kun.uz muxbiri haqiqatga dalolat qiluvchi hech qanday javobni olmadi.
