14:23 / 24.03.2018
12804

Mamlakat oziq-ovqat xavfsizligini hukumat ta'minlaydi

Foto: Norma.uz

«Oziq-ovqat xavfsizligi to‘g‘risida»gi qonun loyihasi Qonun hujjatlari ta'sirini baholash tizimi portalida e'lon qilindi, deb yozmoqda Norma.

Ma'lumot uchun: qonun loyihasi ishlab chiqilishi Prezidentning 16.01.2018 yildagi «Mamlakatning oziq-ovqat xavfsizligini yanada ta'minlash chora-tadbirlari to‘g‘risida»gi PF-5303-son Farmoni bilan nazarda tutilgan.  

Taqdim etilgan qonun loyihasiga muvofiq Vazirlar Mahkamasi ushbu sohada qanday vakolatlar va javobgarlikka egaligi ko‘rsatib o‘tiladi.
 
Birinchidan, Vazirlar Mahkamasi fuqarolarning oziq-ovqat bilan to‘laqonli ta'minlanish huquqlarini kafolatlaydi va davlatning oziq-ovqat xavfsizligini, shu jumladan:

•  mamlakatda oziq-ovqat mahsulotlarining zarur darajada ishlab chiqarilishini;
•  ichki va tashqi salbiy omillar ta'siridan qat'i nazar, davlat oziq-ovqat zaxirasi mavjud bo‘lishi, yangilanishi va to‘ldirilishini;
•  davlatda ishlab chiqariladigan va fuqarolarga sotiladigan oziq-ovqat mahsulotlari sifatining davlat standartlari tizimi talablariga muvofiqligini ta'minlaydi.

Ikkinchidan, loyiha bilan respublikaning oziq-ovqat mustaqilligini ta'minlash uchun javobgarlik Hukumat zimmasiga yuklatilgan. Bir yilda mamlakatda ishlab chiqarilgan hayotiy muhim oziq-ovqat mahsulotlarining hajmi ovqatlanishning fiziologik me'yorlariga muvofiq aholi yillik ehtiyojining kamida 80%ini tashkil etganda, u ta'minlangan deb hisoblanadi. Ya'ni tarkibi va hajmlari bo‘yicha aholi oziq-ovqat ratsionining asosini tashkil etuvchi oziq-ovqat mahsulotlari importining ulushi 20%dan oshmasligi kerak. 

Uchinchidan, oziq-ovqat xavfsizligini ta'minlash va oziq-ovqat bozori ustidan davlat nazorati sohasidagi tegishli nazorat funksiyalari ham nazarda tutilmoqda.

Bunda umuman mamlakat bo‘yicha va mintaqalar kesimida oziq-ovqatning zaruriy va haqiqatda ishlab chiqarish darajalari muvozanatiga asoslanib, oziq-ovqat bozori ustidan davlat nazorati amalga oshiriladi. Vazirlar Mahkamasi uni ham har yili tuzadi.

Loyiha o‘zgartirilishi, unga qo‘shimcha kiritilishi yoki rad etilishi mumkin.

Top