Bugun, 14 may kuni Shayx Zayniddin jome masjidi majlislar zalida ilm-ma'rifat muxlislari intiqib kutgan ziyo anjumani bo‘lib o‘tdi. Anjuman ustoz Odilxon qori Yunusxon o‘g‘lining “Kamtarlik va kibr” va “Ezgulik kushandasi” nomli yangi kitoblari taqdimotiga bag‘ishlandi. Tadbirda taniqli ulamolar, imom-xatiblar, ilm-ma'rifat muxlislari qatnashdi.
Anjuman muqaddas Qur'oni karim tilovati bilan boshlandi. Dastlab, O‘zbekiston musulmonlari idorasi vakili Jaloliddin Nuriddinov kirish so‘zi bilan ochib, Usmonxon Alimovning tabriklarini yetkazdi va mamlakatimizda din rivoji yo‘lida olib borilayotgan islohatlar, kitob mutolaasining tobora kuchayib borayotgani xususida so‘zladi. Shuningdek, “Kamtarlik va kibr” va “Ezgulik kushandasi” kitoblari haqida fikr-mulohazalarini bildirdi. Mazkur asar kibr va manmanlik urchigan, ortiqcha hoyu havasga mukkasidan ketganlar, ezgulik ildiziga bolta uruvchilar bir oz ko‘paygan bir davrda g‘oyatda dolzarb ekanini ta'kidlab, “Avvalo oilaviy mutolaa qilishni tavsiya qilaman”, dedi.
Qolaversa, anjumanda ustoz Abdulloh Ismoil domla, Toshkent islom instuti rektori Uyg‘un G‘ofurov, O‘zbekiston musulmonlari idorasi masjidlar bo‘limi mudiri Rahimberdi Rahmonov va boshqalar so‘zga chiqib, ilm-ma'rifat hamda kitobning inson kamolotidagi muhim o‘rni haqida so‘zladilar.
Ma'lumot o‘rnida aytish kerakki, Odilxon qori Yunusxon o‘g‘li “Ozodalik imonning go‘zal bahosi”, “Masjid odoblari”, “Ro‘za tutish odoblari”, “Haj manosiklari”, “Isrofdan saqlanaylik”, “Mehr-oqibat jannat garovidir”, “Tubanlik girdobi”, “Qo‘shnichilik haqlari va odoblari”, “Jannat kaliti”, “Keng rizq va baraka omillari”, “Tajvid qoidalari” nomli kitob va risolalar, audio-video albomlar muallifidir.
Odilxon qori Yunusxon o‘g‘lining “Kamtarlik va kibr” va “Ezgulik kushandasi” nomli yangi kitoblari poytaxtimizdagi kitob do‘konlaridan, shuningdek, Shayx Zayniddin jome masjidi kitob do‘konidan xarid qilishingiz mumkin.
