Xitoy va AQSh savdo urushiga yo‘l qo‘ymaslikka kelishib oldi

Xitoy va AQSh savdo urushi olib bormaslik va o‘zaro boj to‘lovlari kiritishni to‘xtatishga kelishib oldi. Bu haqda Xitoy davlat kengashi bosh vaziri o‘rinbosari Lyu Xe Vashingtondagi muzokaralar natijalariga ko‘ra ma'lum qildi. 

“Bo‘lib o‘tgan savdo-iqtisodiy maslahatlashuvlarning asosiy natijasi tomonlar savdo urushi olib bormaslik va o‘zaro boj to‘lovlari kiritishni to‘xtatishga kelishib olishgani bo‘ldi”, deb ma'lum qilgan Lyu Xe jurnalistlarga.

Uning ta'kidlashicha, Pekin va Vashington o‘rtasidagi azaliy savdo-iqtisodiy bahslarni hal qilish uchun ko‘p vaqt talab etiladi. “Kelgusida ikki tomonlama munosabatlarni rivojlantirish davomida yangi qiyinchilik va ziddiyatlar yuzaga kelishi mumkin, biroq biz bosiqlik ko‘rsatib, muloqotni qo‘llab-quvvatlashimiz va muammolarni unumli hal qilishimiz kerak”, deb qo‘shimcha qilgan Xitoy vakili.  

Vashingtonda 17-18 may kunlari AQSh va Xitoy savdo delegatsiyalari o‘rtasida maslahatlashuvlar bo‘lib o‘tdi. Uning yakuniga ko‘ra tomonlar AQShning Xitoy bilan savdodagi savdo defitsitini qisqartirishga, Xitoyga AQShning mahsulotlari va xizmatlari eksportini ko‘paytirishga kelishib olishdi.