«Juda ehtiyotkor». Avstriyalik jurnalist Putin bilan intervyu haqida yangi ma'lumotlar berdi

Avstriyaning ORF telekanali jurnalisti Armin Volf Rossiya prezidenti Vladimir Putin bilan 4 iyun kuni o‘tkazilgan intervyudan so‘ng o‘z taassurotlari bilan o‘rtoqlashdi. Bu haqda Politico xabar bergan.

Nashrning ta'kidlashicha, Putin kamdan-kam holatlarda intervyu beradi. Rossiya prezidentining jurnalist bilan deyarli bir soatlik muloqoti Venaga rasmiy tashrifidan avval yuz berdi. ORF telekanali jurnalistining intervyuda qayd etishicha, u suhbatdoshi javoblarini an'anaviy tarzda bo‘lib qo‘ygan, biroq buni odatdagidan kamroq qilgan - 54 daqiqada 11 marta. Armin Volfning aytishicha, intervyudan so‘ng o‘zining xorijiy hamkasblaridan ijobiy reaksiyani ko‘rgan. Uning qo‘shimcha qilishicha, intervyuga besh kun jiddiy tayyorgarlik ko‘rilgan. U Vladimir Putinning avvalgi barcha intervyularini ko‘rib chiqdi hamda rossiyalik ekspertlar bilan suhbatlashdi.

«Bu eng boshidan murakkab intervyu edi, bunga uchta sabab bor edi», - deya qayd etadi Volf.

Birinchi qiyinchilik shunda bo‘lganki, intervyu televizion shouning oddiy studiyasida emas, balki Kremlda o‘tgan. Ikkinchisi - sinxron tarjima tez reaksiya bildirishni murakkablashtirgan. So‘nggi qiyinchilik esa, Volfning so‘zlariga ko‘ra, Vladimir Putin «ehtiyotkor suhbatdosh» ekani, hamda savolga ko‘p paytlarda o‘z savoli bilan javob qaytarishida bo‘lgan. Shuningdek, Volfning ta'kidlashicha, u intervyuni uch yarim soat kutgan. Avstriyalik jurnalistning bildirishicha, Rossiya prezidenti «nemis tilida juda yaxshi gaplashadi».

Eslatib o‘tamiz, avvalroq Putin nemis tilida jurnalistdan o‘z so‘zini bo‘lmaslikni so‘ragandi.