AQSh Xitoyning iqtisodiy siyosatiga qarshi xalqaro koalitsiya tuzadi

Amerika Qo‘shma Shtatlari Xitoy hukumatining iqtisodiy sohadagi siyosatiga qarshi xalqaro koalitsiya tuzadi. Bu haqda AQSh davlat kotibining iqtisodiyot va tadbirkorlik masalalari bo‘yicha yordamchisi Manisha Singx Kongress Senatining xorijiy ishlar bo‘yicha qo‘mitasidagi tinglovlarda ma'lum qildi.

“Xitoyning bizni tashvishga solayotgan iqtisodiy tajovuzkorligiga nisbatan javob choralarini qo‘llash Amerikaning ittifoqchi va sheriklari tomonidan ham ma'qullanmoqda. Biz Xitoyning bozor kon'yukturasini buzadigan, texnologiyalarni berishga majbur qiladigan va muhim intellektual mulkni o‘g‘irlashga imkon beradigan davlat siyosatiga qarshi xalqaro koalitsiya tuzamiz”, - dedi u qo‘mitaning Vashington ma'muriyatining bojxona to‘lovlarini kiritish qaroriga bag‘ishlangan majlisida.