Qoraqalpog‘istondagi YTHda besh kishi halok bo‘ldi

11 iyul kuni Qoraqalpog‘iston Respublikasining Ellikqal'a tumanida sodir bo‘lgan avtohalokat oqibatida besh kishi halok bo‘ldi va bir kishi jarohatlandi, deb xabar berdi O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi.

Xabarda aytilishicha, “Bo‘ston-Beruniy-Cholish-Urganch” yo‘lining 3-kilometrida “Neksiya” rusumli avtomobil qarama-qarshi tomondan harakatlanib kelayotgan “Kobalt” rusumli avtomashina bilan to‘qnashib ketgan.

Natijada har ikki avtomashina haydovchilari jarohat olib voqea joyida, uch nafar yo‘lovchi esa kasalxonada vafot etganlar. Shuningdek, “Neksiya” avtomashinasining yana bir nafar yo‘lovchisi kasalxonaga yotqizilgan.