Mirzo Bedil ko‘chasidagi «zebra» tiklandi. Shu bilan muammo bartaraf bo‘ldi, deb hisoblasak bo‘ladimi?

Kecha, 25 iyul kuni Samarqand shahridagi Mirzo Bedil ko‘chasida bo‘yoqlari o‘chib ketgan piyodalar o‘tish joyi va sinib yotgan yo‘l belgisi haqida «Bolalar serqatnov yo‘ldagi «zebra»ni bo‘r bilan qayta tiklamoqchi bo‘lishdi» sarlavhasi ostida reportaj e'lon qilgan edik.

Samarqand viloyat IIB YHXBning Kun.uz’ga ma'lum qilishicha, mazkur chorrahadagi yotiq chiziqlar (zebra) qaytadan chizilgan va 1 dona yetishmayotgan 5.16.2 «Piyodalar o‘tish joyi» yo‘l belgisi o‘rnatilgan.

 Shuningdek, mazkur ko‘chadagi yana ikkita kichik chorrahadagi piyodalar o‘tish joyi yotiq chiziqlari ham qayta tiklangan.

Albatta, muammoli holat zudlik bilan bartaraf etilgani quvonarli hol. Lekin yo‘llarda piyodalar xavfsizligini ta'minlash borasida Samarqand viloyat IIB YHXBdan tizimli va samaradorligi yuqoriroq ishlar amalga oshirilishi talab qilinadi. Buni xabar ostiga sharh yozgan samarqandliklarning fikrlaridan ham bilib olsa bo‘ladi.

Masalan, mana shu ko‘chaning yuqorirog‘ida Samarqand tayanch tibbiyot kolleji, undan sal teparoqda Viloyat perinatal markazi oldidagi yo‘lovchilar o‘tish joyining ham bo‘yoqlari o‘chib yotibdi, u joylarda ham piyodalarning yo‘lni kesib o‘tishida muammolar yuzaga kelmoqda va aminmanki, u yerdagi «zebra»lar bo‘yab qo‘yilmagan.

Xullas kalom, bunday bo‘yog‘i o‘chgan piyodalar o‘tish joyi shaharda juda ko‘p. Modomiki, ularning barchasining bo‘yog‘i yangilab chiqilsa ham birinchi yomg‘irgacha chidab beradi, xolos. Ilk yomg‘ir yog‘ishi bilan yo‘ldagi oq buyoq o‘chadi, bu yog‘i kuz, qish, bahorning yog‘in-sochinli kunlarigacha yana o‘sha ahvolga duch kelamiz.

Samarqandda haydovchilik madaniyati o‘ta past ekanligini ham qayd etish joiz. Yo‘l belgisi turgan bo‘lsa ham, yo‘lda «zebra» oppoq bo‘lib ko‘rinib turgan bo‘lsa ham piyodalarning ustiga mashina haydaydigan, ularga yo‘l bermaydigan, «zebra» ustidan yo‘lni kesib o‘tayotgan piyodalarni bo‘ralatib so‘kib ketadigan haydovchilar ham talaygina.

Endi buyog‘i o‘chgan «zebra» ular uchun tekis yo‘l degani. Bunday joylardan yo‘lni kesib o‘tayotgan piyodalar esa ular uchun yo‘ldagi «pomexa».

Viloyat YHXB bu holatda nimalar qilishi kerak. Albatta, bu boradagi chet el tajribasiga suyanishi kerak. Samarqanddek shaharda katta yo‘llarning har 120–150 metrida piyodalar o‘tish joyi bo‘lishi maqsadga muvofiq sanaladi. Ayni paytda yo‘llarning o‘rtasidagi panjaralar olib tashlangach, piyodalar tomonidan ham yo‘llarning qatnov qismini duch kelgan joydan kesib o‘tish holatlari ko‘paymoqda. Zero, shahar yo‘llari, avvalo, piyodalar uchun qulay bo‘lmog‘i kerak, haydovchilar uchun emas.

Umuman, oliygoh, litsey-kollejlar, maktab, maktabgacha ta'lim muassasalari, sport inshootlari, tug‘uruqxonayu shifoxonalar oldidagi piyodalar o‘tish joyi xorijiy davlatlardagidek, ko‘tarma piyodalar o‘tish joyi bilan jihozlanishi shart.

Piyodalar o‘tish joyi har qanday haydovchini o‘z avtomashinasi tezligini 15–20 km/soatgacha tushirishga majbur qiladigan «yotiq politsiyachi» bilan ta'minlangan — biroz sathi ko‘tarilgan hudud bo‘lishi kerak. Ana shunda:

1). Haydovchilar bunday joyga yaqinlashganida o‘z tezligini keskin kamaytirishga majbur bo‘lishadi;

2). Piyodalar o‘tish joyining bo‘yoqlari o‘chib ketsa ham, yilning istalgan faslida piyodalar o‘tish joyi yo‘lovchilar uchun xavfsiz hududligicha qolaveradi;

Samarqand viloyat YHXB yo‘llarda piyodalarning xavfsizligini oshirish uchun haftaning ma'lum bir kunida «Diqqat, piyodalar» tadbirini tashkillashtirishi, shahardagi piyodalar o‘tish joylarida piyodalarning xavfsizligini ta'minlamaydigan, ularga yo‘l bermaydigan haydovchilarni muntazam jazolashlari, shahardagi chorrahalarda joylashtirilgan LED ekranlarning barchasida piyodalarning xavfsizligini ta'minlashni targ‘ib qiluvchi ijtimoiy roliklarni aylantirish, ularning namoyish etilishini ko‘paytirish talab etiladi.

Shuhrat Shokirjonov,

jurnalist