Kanada TIV Saudiya Arabistonidan elchisini chaqirib olgani uchun izoh talab qildi

Kanada TIV Saudiya Arabistonining Ottavadagi elchisini chaqirib olgani haqidagi xabardan tashvishda va Ar-Riyoddan bu borada izoh so‘ramoqda, deb xabar berdi CBC telekorporatsiyasi.

Avvalroq Saudiya Arabistoni matbuot agentligi mamlakat TIV Saudiyaning Ottavadagi elchisini chaqirib olgani va Kanada elchisini persona non-grata deb e'lon qilgani hamda unga mamlakatni tark etish uchun 24 soat muhlat bergani haqida xabar qilgandi. 

Bundan tashqari, Saudiya Arabistoni Kanada bilan bo‘ladigan barcha yangi savdo va investitsion o‘tkazmalarni muzlatib qo‘yganini e'lon qildi. 

Payshanba kuni Kanada TIV rahbari Xristya Friland Saudiya Arabistonida bloger Raif Badaviyning singlisi, huquqshunos Samar Badaviyning hibsga olinganidan "judayam tashvishda" ekanligini bildirgan va ularni ozod qilishga chaqirgandi.

"Saudiya Arabistonining liberal tarmog‘i" internet sayti asoschisi Raif Badaviy 2012 yilda diniy ulamolar va qirollik diniy politsiyasini tanqid qilgani uchun hibsga olingandi. U shuningdek islom dinini tahqirlash, kiberjinoyatlar va Saudiya Arabistonida jinoyat hisoblanuvchi otasiga bo‘ysunmaslikda ayblangan. Badaviy o‘n yillik qamoq jazosini o‘tamoqda.