Mudofaa vazirligi markaziy apparatida IV Xalqaro armiya o‘yinlari sovrindorlarini taqdirlashga bag‘ishlangan marosim bo‘lib o‘tdi.
Dunyoning 32 mamlakati harbiylari ishtirok etgan “ArMI-2018” musobaqasida o‘zbekistonlik harbiy xizmatchilar umumjamoa hisobida 6-o‘rinni egalladi.
Mudofaa vazirligi harbiy xizmatchilari 28 yo‘nalishning 12tasida qatnashib, 6 ta sovrinli o‘rinni qo‘lga kiritdi. Harbiylarimiz “Qo‘shin razvedkasi a'lochilari”, “Merganlik marrasi” va “Sodiq do‘st” kabi yo‘nalishlarda rekord natijalarni qayd etdi.
Taqdirlash marosimida O‘zbekiston mudofaa vaziri Abdusalom Azizov sovrindorlarni qo‘lga kiritilgan natijalar bilan qutladi va ularga esdalik sovg‘alari hamda pul mukofotlarini topshirdi. Tadbirning rasmiy marosimi yakunlangach, Xalqaro armiya o‘yinlari ishtirokchilari uchun bayram dasturxoni yozilib, ular sharafiga kuy-qo‘shiqlar ijro etildi.
