Oyligi oshgan o‘qituvchilar, majburiy akkreditatsiya va ruxsatnoma so‘ralmaydigan “urug‘”lar – 1 sentabrdan nimalar o‘zgaradi?

5. Bugundan boshlab tadbirkorlik sub'yektlarining moliya-xo‘jalik faoliyati bilan bog‘liq bo‘lmagan rejali tekshiruvlar, shuningdek, soha faoliyatida o‘tkaziladigan nazorat tartibidagi tekshiruvlar bekor qilinadi.

Endilikda tadbirkorlik sub'yektlari faoliyatini tekshirish tashabbusi bilan chiqish tekshiruvni tashabbus qilishni nazarda tutuvchi “xavfni tahlil etish” tizimi natijalari asosida amalga oshiriladi.

6. 2018 yil 1 sentabrdan:

• davlat va jamoat ehtiyojlari uchun yer uchastkalarini olib qo‘yish to‘g‘risida qaror qabul qilishga faqat yer uchastkasi olib qo‘yilishi rejalashtirilayotgan manfaatdor shaxslar bilan ochiq muhokama o‘tkazilganidan, shuningdek, foyda va xarajatlar baholanganidan keyin yo‘l qo‘yiladi;

• yer uchastkalarini olib qo‘yishda jismoniy va yuridik shaxslarga tegishli bo‘lgan turar joy va ishlab chiqarish binolari, boshqa imoratlar va inshootlarning buzilishiga ko‘chmas mulkning bozor qiymati va olib qo‘yish sababli mulkdorga yetkazilgan zararning o‘rni to‘liq qoplanganidan keyin ruxsat beriladi;

• jismoniy va yuridik shaxslarga davlat organi (mansabdor shaxs)ning noqonuniy ma'muriy hujjati qabul qilinishi oqibatida yetkazilgan zarar davlat tomonidan, birinchi navbatda, tegishli organlarning byudjyetdan tashqari mablag‘lari hisobidan qoplanadi, keyinchalik aybdor shaxsdan regress tartibida undirib olinadi.

7. Mulkchilik shaklidan qat'i nazar, barcha shaxmat klublari hamda shaxmatga o‘qitish va tayyorlashni amalga oshiruvchi boshqa sport muassasalari endilikda majburiy akkreditatsiyadan o‘tkaziladi.

8. Umumiy o‘rta ta'lim muassasalari xodimlarining bazaviy tarif stavkalari shu bugundan boshlang‘ich sinf o‘qituvchilari uchun 1,1 baravarga, yuqori sinf o‘qituvchilari uchun o‘rtacha 1,24 baravargacha, direktor, uning o‘rinbosarlari va axborot-resurs markazi (kutubxona) mudirlari va kutubxonachilari uchun 1,1 baravarga oshiriladi.

Shuningdek, umumiy o‘rta va o‘rta maxsus ta'lim muassasalarida o‘quvchilar sonidan kelib chiqib, psixolog shtat birligi maktabdagi o‘quvchilar soni 250 nafargacha 1 shtat birligi, 250 nafardan 800 nafargacha 1,5 shtat birligi, 800 nafardan 1600 nafargacha 2 shtat birligi, 1600 nafardan 3000 nafargacha 2,5 shtat birligi, 3000 nafardan ortiq 3 shtat birligi etib belgilanadi.

Bundan tashqari, maktab psixologlarining bazaviy tarif stavkalar mutaxassis o‘qituvchilar bazaviy tarif stavkalarining 90 foiziga tenglashtiriladi.

9. “Jahon iqtisodiyoti va diplomatiya universiteti faoliyatini tubdan takomillashtirish chora-tadbirlari to‘g‘risida”gi Prezident qaroriga ko‘ra, universitet huzurida tashkil etilgan Oliy diplomatiya maktabida bugundan boshlab quyidagi xodimlar toifalari majburiy tartibda qayta tayyorlanadi va malaka oshiradi:

• Tashqi ishlar va Tashqi savdo vazirliklari, tashqi siyosiy hamda tashqi iqtisodiy faoliyatga jalb qilingan boshqa vazirlik va idoralar, mahalliy davlat hokimiyati organlarining ma'muriy-boshqaruv xodimlari – uch yilda bir marta;

• tashqi siyosiy hamda tashqi iqtisodiy faoliyat sohasida vazifalarni bajarish bilan bog‘liq rahbarlik lavozimiga tayinlash uchun zaxiraga olingan davlat va xo‘jalik boshqaruvi organlari, mahalliy davlat hokimiyati organlari, boshqa ixtisoslashtirilgan davlat muassasalari xodimlari;

• O‘zbekiston Respublikasining xorijdagi muassasalari hamda xalqaro tashkilotlarning O‘zbekiston uchun ajratilgan kvotalariga diplomatik va ma'muriy-texnik lavozimlarga tayinlanadigan xodimlar, shu jumladan, ularning turmush o‘rtoqlari;

• xalqaro munosabatlar hamda siyosiy fanlar, xalqaro iqtisodiyot va menejment, xalqaro ommaviy hamda xususiy huquq, gid hamrohligi va tarjimonlik faoliyati yo‘nalishidagi oliy ta'lim muassasalarining pedagog kadrlari – uch yilda bir marta.

10. Qishloq xo‘jaligi ekinlari urug‘larini eksport qilishda ruxsatnoma talab qilinmaydi. Endilikda bitta viloyatda o‘ntadan ko‘p, bitta tumanda beshtadan ko‘p donli boshoqli ekinlarning rayonlashtirilgan navlarini, shuningdek, bitta viloyatda beshtadan ko‘p, bitta tumanda ikkitadan ko‘p g‘o‘zaning rayonlashtirilgan navlarini joylashtirishga yo‘l qo‘yilmaydi (sinov o‘tkazish uchun joylashtiriladigan yangi navlar bundan mustasno).

Shuningdek, donli boshoqli ekinlar va g‘o‘za navlarini sinovdan o‘tkazish muddati ikki yildan, boshqa qishloq xo‘jaligi ekinlarini sinovdan o‘tkazish muddati bir yildan oshmasligi, O‘zbekiston hududida ekish uchun tavsiya etilgan qishloq xo‘jaligi ekinlari urug‘larining navlarini (donli boshoqli ekinlar, g‘o‘za va kartoshka urug‘laridan tashqari) majburiy ro‘yxatdan o‘tkazish va Davlat qishloq xo‘jalik ekinlari reyestriga kiritish to‘g‘risidagi talab bekor qilinadi.

11. 2018 yil 1 sentabrdan boshlab:

• tayyorgarlik (5 yoshdan 6-7 yoshgacha) guruhi tarbiyachilari, oliy ma'lumotli o‘qituvchilar, defektologlar, psixologlar mehnatida haq to‘lashning bazaviy tarif stavkalarini, ularning bazaviy tarif stavkalari miqdorlarini umumta'lim maktablari boshlang‘ich sinflari o‘qituvchilarining bazaviy tarif stavkalari miqdorlariga tenglashtirgan holda – 30 foizga;

• oliy yoki o‘rta maxsus, kasb-hunar pedagogik ma'lumotli tarbiyachining o‘rinbosarlari mehnatiga haq to‘lashning bazaviy tarif stavkalarini – 20 foizga;

• maktabgacha ta'lim muassasalari mudirlari mehnatiga haq to‘lashning bazaviy tarif stavkalarini – 10 foizga tabaqalashtirib oshiriladi.