Eron O‘zbekistonning qator mahsulotlariga eksport uchun ruxsatnoma beradi

O‘zbekiston O‘simliklar karantini va himoyasi agentligi direktori Ibrohim Ergashev boshchiligida delegatsiya Tehronga tashrifi davomida Eron O‘simliklarni himoya qilish tashkiloti raisi Maryam Jalili bilan uchrashuv o‘tkazdi.

Foto: Dunyo

Muzokaralar davomida O‘zbekistonda yetishtirilayotgan no‘xat, zanjabil, makkajo‘xori, soya, pista va kaper mevalari kabi qishloq xo‘jaligi mahsulotlariga Eron tomonidan ruxsatnoma berish masalasini yakuniga yetkazish istiqbollari muhokama qilindi.

Eron O‘simliklarni himoya qilish tashkiloti raisi Maryam Jalili O‘zbekistonning fitosanitar talablariga muvofiq keladigan toza yer hududlarida yetishtirilgan sertifikatlangan kartoshka eksportini qo‘llab-quvvatlashga tayyorligini bildirdi.

Tomonlar Eron tajribasi asosida O‘zbekistonda sifatli kartoshka urug‘larini yetishtirishga alohida e’tibor qaratdilar.

Muzokaralar yakunida O‘zbekiston va Eron karantin tashkilotlari o‘rtasida ishlab chiqilgan anglashuv memorandumi loyihasini huquqiy ekspertizadan o‘tkazish va imzolashga kelishib olindi.