Erdo‘g‘an Idlibdagi vaziyat fonida Rossiya bilan hamkorlik muhimligini ta'kidladi

Turkiya prezidenti Rajab Toyyib Erdo‘g‘anning ma'lum qilishicha, Suriya hukumat qo‘shinlari tomonidan Idlibda o‘tkazilishi mumkin bo‘lgan harbiy amaliyotlar tufayli Turkiya-Rossiya hamkorligi muhim ahamiyat kasb etadi. Bu haqda RIA «Novosti» Turkiya televideniyesiga asoslangan holda xabar bermoqda.

Erdo‘g‘anning so‘zlariga ko‘ra, voqealarning bunday rivoji ko‘plab odamlarning halok bo‘lishiga olib keladi, boshqalar esa gumanitar falokat sodir bo‘lgan taqdirda, Turkiya hududiga yo‘l oladi. Uning qo‘shimcha qilishicha, agar muzokaralar jarayonida tegishli yechim topilsa, bundan qochish mumkin bo‘ladi.

«Hozirda Turkiya bilan Rossiya o‘rtasidagi hamkorlik juda muhim», - dedi Erdo‘g‘an.

Eslatib o‘tamiz, avvalroq Turkiya Suriya bilan chegaraga tanklar yuborgani xabar berilgandi.