Noma’lum shaxs Toshkentdagi 71-maktabda «qirg‘in» uyushtirish bilan tahdid qildi

Toshkent shahar Maktabgacha va maktab ta’limi boshqarmasi ijtimoiy tarmoqlarda 71-sonli maktab o‘quvchilari xavfsizligiga tahdid qilingani yuzasidan tarqalgan xabarlarga munosabat bildirdi.

Ushbu xabarlarda maktab hududida sovuq qurol bilan «qonli qirg‘in» uyushtirilishi ta’kidlangan. «Biz qamoqdan ham, hukumatdan ham qo‘rqmaymiz, biz o‘z ambitsiyalarimizni qanoatlantirgan holda o‘z maqsadimiz tomon boramiz», — deyiladi xabarda.

Qayd etilishicha, Mirzo Ulug‘bek tumanidagi 71-sonli umumta’lim maktabida ta’lim jarayonlari boshqarma tomonidan to‘liq nazoratga olingan. Bugun maktabning birinchi va ikkinchi navbatidagi darslar belgilangan jadval asosida o‘tkazilgan. Tarmoqlarda tarqalgan anonim yozilgan xabar o‘z isbotini topmagan.

«Yuqoridagi anonim yozilgan xabar o‘z isbotini topmadi. Maktab ma’muriyati, Milliy gvardiya, psixolog-inspektor ishtirokida ota-onalar va o‘quvchilar bilan tushuntirish ishlarini amalga oshirib, bu kabi asossiz xabarlarga ishonmaslikka hamda doimo hushyor bo‘lishga chaqirgan», — deyiladi munosabatda.