Headwall Power LLC O‘zbekistonda 1,2 mlrd dollarlik quyosh panellarini o‘rnatadi

Surxondaryo viloyati hokimligida Amerika Qo‘shma Shtatlarining Headwall Power LLC kompaniyasi vakillari ishtirokida muloqot bo‘lib o‘tdi. 

Viloyat hokimligi bergan xabarga ko‘ra, muloqotda viloyatning muqobil energiya manbalari sohasidagi salohiyati, quyosh energetikasini rivojlantirish, shu jumladan quyosh elektr stansiyalarini bunyod etish bo‘yicha qo‘shma loyihalarni amalga oshirishdagi mavjud imkoniyatlar haqida so‘z yuritildi.

Muloqot chog‘ida Headwall Power LLC kompaniyasining qayta tiklanadigan energetika sohasidagi muvaffaqiyatli loyihalari haqida to‘xtalib o‘tildi. 

Ushbu kompaniya tomonidan Qiziriq tumanida quvvati 300 megavatdan 1 gigavatgacha bo‘lgan, umumiy qiymati 1,2 mlrd dollarlik loyihalarni amalga oshirish, bunda birinchi bosqichda Bandixon massivida 490ta xonadonga tajriba tariqasida quyosh panellarini o‘rnatishga kelishib olindi.