Turkmaniston bir oydan beri chegarada ushlab turgan tojik yuk mashinalarini o‘tkaza boshladi 

5 oktabrdan bir oydan beri Turkmaniston chegarasida turgan tojik yuk mashinalari Tojikiston tomon va ortga o‘tkazila boshlandi.  

“Tojik yuk tashuvchilariga tegishli mashinalar 5 oktabrdan chegaradan o‘tkazila boshlandi. 4 oktabrda Tojikiston uchun mo‘ljallangan Eron va Turkiyaga qarashli yuk mashinalar o‘tkazila boshlangan”, deb ma'lum qilingan Tojikiston transport vazirligida.    

Ma'lum qilinishicha, bu vaqt ichida temir yo‘l yuklari harakatlanishi ham taqiqlangan. Ta'kidlanishicha, 5 oktabrdan bu yuklar ham chegaradan o‘tkazila boshlangan.   

Bu orada tojik transportining Turkmaniston chegarasida uzoq vaqt to‘xtatib turilgani sababi ma'lum qilinmagan.

Turkmaniston bojxonachilari avgust oxiridan Tojikiston uchun mo‘ljallangan va Tojikistondan eksport qilinuvchi yuklarni o‘z hududidan o‘tkazmay qo‘ygan.

Tojikiston transport vazirligi yuk mashinalarining ushlanishi sababini tushuntirish iltimosi bilan Turkmanistonga murojaat qilgan. Biroq Tojikistondagi rasmiy idoralar Turkmanistondan bu borada javob olinganini na tasdiqlashgan va na rad etishgan.  

Biroq Tojikistonning tegishli idoralaridagi manbaning ta'kidlashicha, Turkmaniston murojaatga darhol javob berib, yuk mashinalar qatnovi cheklanishini o‘z hududidagi xavfsizlik masalalari bilan bog‘lagan. 

“Aslida esa siyosiy sabablar bo‘lishi mumkin. Tojikiston kelgusida o‘z yuklari tranziti uchun hozirda iliq munosabatlarda bo‘lgan O‘zbekistondan foydalanishni ma'qulroq ko‘rayotganini aytmoqda. Bu esa Turkmaniston hukumatiga yoqmagan bo‘lishi mumkin”, deb aytgan manba.  

Tojikistonning rasmiy idoralari bu mavzuda suhbatlashishdan tiyilmoqdalar. Bir amaldorning aytishicha, ularga bu masala bo‘yicha izoh bermaslik buyurilgan.