Britaniyalik mashhur musiqachilar Tereza Meyga xat yuborishdi. Ular Brexit’ga qarshi 

Britaniyalik musiqachilar mamlakat bosh vaziri Tereza Meyga ochiq xat yo‘llashdi, unda ular Brexit - Yevropa ittifoqi tarkibidan chiqishga qarshi ekanliklarini bildirdilar.

Bosh vazir nomiga maktubni musiqachi Bob Geldof yozgan. Matn The Guardian'da e'lon qilindi, murojaatga Ed Shiran, Rita Ora, Sting, Deymon Albarn, Jarvis Koker va Brayan Ino kabi taniqli ijrochilar imzo qo‘yishgan.

Maktub mualliflarining fikriga ko‘ra, Yevropa ittifoqidan chiqish ularni «madaniy qamoqxonaga» tashlaydi va pullardan mahrum etadi, chunki Buyuk Britaniyaning Yevroittifoqdan chiqishi bo‘yicha referendumdan keyin gastrollar hamda ovoz yozishga sarflanadigan xarajatlar oshdi. «Klublarga borish, musiqa, o‘zlarining sevimli musiqachilari surati tasvirlangan futbolkalarni xarid qilish uchun fuqarolarda pul yo‘q, sababi ularning daromadi tushib ketdi», - deya yozadi ular. Ijodkorlar YeIdan ketmaslikka chaqirishgan.

Eslatib o‘tamiz, avvalroq Bloomberg Tereza Mey siyosati Britaniyaning talablariga javob bermasligi haqida yozgandi.