Hayvon egalaridan identifikatsiya qilish xizmatlari uchun to‘lovlar undiriladi

Normativ-huquqiy hujjatlar loyihalari muhokamasi portalida Hayvon egalaridan identifikatsiya qilish xizmatlari uchun to‘lovlar undirish shartlari va tartibi to‘g‘risidagi nizom loyihasi joylashtirildi.

Qayd etilishicha, hayvon egalari:

veterinariya xizmatidan hayvonlarning kasallikka chalinishi holati, epizootik vaziyat to‘g‘risida, shuningdek, hayvonlarda o‘tkazilgan maxsus tekshirishlar natijalari, ularga ko‘rsatilgan veterinariya xizmati uchun to‘lovlar miqdorlari haqida axborot va boshqa ma'lumotlarni olish;

identifikatsiya qilish bo‘yicha davlat veterinariya xizmati bilan shartnomalar tuzish;

hayvonlarni, kelib chiqishi hayvonotga mansub mahsulot va xom ashyoni, ozuqalarni, ozuqabop qo‘shimchalarni, veterinariya dori va texnika vositalarini veterinariya, veterinariya-sanitariya qoidalari va normalariga muvofiq olish;

veterinariya to‘g‘risidagi qonun hujjatlari talablariga rioya etish;

o‘zlariga tegishli hayvonlar kasalliklarining oldini olishga qaratilgan tashkiliy-xo‘jalik va veterinariya tadbirlarini o‘z mablag‘lari hisobidan amalga oshirish, O‘zbekiston Respublikasi Davlat byudjyetidan moliyalashtiriladigan tadbirlar bundan mustasno;

hayvonlarni yuqumli kasalliklardan muhofaza etish bo‘yicha tegishli karantin tadbirlari va boshqa veterinariya tadbirlari o‘tkazilishini, shuningdek, to‘liq hajmda davolash-profilaktika tadbirlari o‘tkazilishini ta'minlash;

hayvonga berilgan identifikatsiya raqamini saqlovchi atributi va veterinariya pasporti uchun belgilangan to‘lovlarni o‘z vaqtida amalga oshirishga majburdir.

Hayvon egalaridan hayvonlarni identifikatsiya qilish xizmatlari uchun to‘lov miqdori quyidagi tartibda amalga oshiriladi:

Yirik shoxli mollar ot, eshaklar va tuyalar – eng kam ish haqining 2 foizi;
Mayda shoxli mollar, cho‘chqa –  eng kam ish haqining 1,5 foizi;
It va mushuklar –  eng kam ish haqining 1 foizi.

Hayvonlarni identifikatsiya qilish xizmatlari veterinariya muassasasi va hayvon egalari o‘rtasida tuzilgan shartnomaga asosan amalga oshiriladi. 

Shartnomada hayvonlarni identifikatsiya qilish xizmatlarini olish muddatlari, hisob-kitob tartibi, tomonlarning huquqlari, majburiyatlari va javobgarligi belgilanadi.