Toshkent metrosida yangi tajriba: to‘lov - kaftdagi “tomir izi” bilan

Toshkent metropolitenida yo‘l haqini kaft orqali to‘lash tizimi ishga tushirildi. Yangi tizimga ko‘ra, metroga kirish uchun endi transport kartasi yoki smartfon talab etilmaydi — yo‘lovchi kaftdagi tomir chiziqlari bo‘yicha biometrik identifikatsiyadan o‘tib, to‘lovni amalga oshiradi.

Ma’lum qilinishicha, ayni paytda innovatsion tizim 49 ta bekatda o‘rnatilgan. Undan har kuni o‘rtacha 20–25 ming nafar yo‘lovchi foydalanmoqda. Qayd etilishicha, tizimdan foydalanish uchun ro‘yxatdan o‘tish jarayoni 5 daqiqa atrofida vaqt oladi.

Mutaxassislar fikriga ko‘ra, ushbu texnologiya bekatlardagi navbatlarni sezilarli qisqartirish va yo‘lovchilarning vaqtini tejashga xizmat qiladi. 

Shu bilan birga, bunday yechimlar shahar infratuzilmasiga bo‘lgan ishonchni oshirishi, Toshkentda fintex tashabbuslarini rivojlantirish uchun barqaror va xavfsiz muhit bosqichma-bosqich shakllantirilayotganini ko‘rsatishi ta’kidlanmoqda.