Kreml Putin bilan Singapurda ro‘y bergan holatga izoh berdi

Rossiya prezidentining matbuot kotibi Dmitriy Peskov Singapur xavfsizlik xizmatlari Vladimir Putindan metallqidirgich ramkasidan o‘tishni so‘ragani haqidagi ma'lumotni rad etdi. Bu haqda 15 noyabr, payshanba kuni «Govorit Moskva» radiostansiyasi o‘z Telegram-kanalida xabar berdi.

«U xuddi hamma kabi turniket orqali o‘tdi», - dedi Kreml vakili.

Avvalroq, Kremlga yaqin jurnalist Dmitriy Smirnov payshanba kuni Putin Rossiya - ASeAN sammiti vaqtida metallqidirgich ramkasidan o‘tmagani, «Kommersant'» gazetasi maxsus muxbiri Andrey Kolesnikovning bu boradagi xabari asossiz ekanini xabar berdi.

Andrey Kolesnikov Singapurda Rossiya - ASeAN sammiti oldidan Rossiya prezidenti Vladimir Putinni o‘rnatilgan tartib-qoidaga zid ravishda metallqidirgich ramkasidan o‘tishga majbur qilishgani haqida xabar tarqatgandi.

Muxbirning aytishicha, sammit o‘tgan Suntec savdo-ko‘rgazma markazida Putin har doimgidek metallqidirgich ramkasi yonidan o‘tib ketmoqchi bo‘lganda, unga ramka orqali o‘tishi kerakligini ko‘rsatishgan. Kolesnikovning ta'kidlashicha, bu «hech kuzatilmagan noodatiy hodisa» bo‘lgan: prezidentlarga odatda «doimo mavjud va biror ustunchalar bilan chegaralab qo‘yiladigan» qo‘shimcha o‘tish joyi ochiladi.    

Putin Singapurga 13 noyabrda 3 kunlik tashrif bilan keldi.