Tadbirkorlardan 7 ming quti gugurt yoki 70 ming dollar berishlarini talab qilgan shaxs qo‘lga olindi

Chilonzor tumanidagi MChJlardan birining mansabdor shaxslaridan 7 ming quti gugurt yoki 70 ming dollar berishni talab qilgan shaxs qo‘lga olindi. Bu haqda O‘zbekiston Bosh prokuraturasi matbuot xizmati xabar berdi.

Xabarda aytilishicha, departamentning Chilonzor tuman bo‘limi tomonidan tuman prokuraturasi xodimlari bilan hamkorlikda tumandagi «K.P» MChJ binosida tezkor tadbir o‘tkazilgan. 

“Fuqaro S.I. mazkur jamiyat mansabdor shaxslari ustidan Bosh prokuratura va boshqa huquqni muhofaza qiluvchi organlarga ariza bilan murojaat qilish orqali qo‘rqitib, tovlamachilik yo‘li bilan 7000 quti gugurt mahsuloti yoki 70000 AQSh dollari berishni talab qilib, shundan 10000 AQSh dollarini olgan vaqtida ashyoviy dalillar bilan ushlangan”, deyiladi xabarda.

Mazkur holat yuzasidan S.I.ga nisbatan O‘zbekiston Respublikasi Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda.