15 mln so‘mlik zargarlik buyumlarini o‘g‘irlagan shaxslar ushlandi

Joriy yilning 13 dekabr kuni Samarqand shahrida Beruniy ko‘chasida yashovchi M.Sh. (ayol) IIBga murojaat qilgan, deb xabar bermoqda O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi.

U shu yil 8 noyabr kuni noma'lum shaxs uyiga ochiq qolgan eshik orqali kirib, xonasidan maishiy texnikasini va umumiy qiymati 15 mln. 400 ming so‘m bo‘lgan zargarlik buyumlarini o‘g‘irlab ketganligini ma'lum qilgan.

Ko‘rilgan choralar natijasida ushbu jinoyatni Samarqand shahrida yashovchi M.K. va G.A. (ayol)lar sodir etganliklari aniqlanib, ushlanganlar.

Ushbu holat yuzasidan jinoyat ishi qo‘zg‘atilgan. Tergov harakatlari olib borilmoqda.