«Kompyuterlar ustiga soyabon tutishni boshlayapman». Muzrabotdagi maktab nega qishga tayyor emas?

«Chakka o‘tganda kompyuterlarni artamiz, quritgich bilan quritamiz. Ertalab keliboq, deraza oynalarini ochib, xonadagi namlikni chiqarib yuboramiz. Agar yaqin kunlarda maktab tomi ta'mirlanmasa, yanagi yilda kompyuterlar yaroqsiz holga kelmasligiga kafolat yo‘q», deydi murojaatchi.

Maktabning o‘quv ishlari bo‘yicha direktor o‘rinbosari N.A. esa «Xalq ta'limi bo‘limiga xat bilan chiqilgani, mablag‘ ham ajratilgani, quruvchi tashkilot ta'mir xomashyosini maktab binosiga keltirib qo‘ygani, lekin hali ish boshlanmagani, erta indin boshlanib qolishi»ni aytdi.

Ma'lum bo‘lishicha, maktab tomini ta'mirlash uchun qurilish tashkilotiga hozircha mablag‘ning 15 foizi o‘tkazilgan. Mablag‘ning qolgan qismi ta'mir ishlarining ma'lum qismi bajarilgach, tushirib berilishi va'da qilingan. Ammo bu noma'lum sabablarga ko‘ra ortga surib kelinmoqda.

«4-chorak yopilgach, banklarda operatsiyalar mart oyigacha to‘xtatiladi. Bu esa «ta'mirlash ishlari yanagi yilga qoldi» degani. Shu bois ta'mir ishlarini bajarish uchun juda oz fursat qolgan», deydi murojaatchi.

Yuqorida aytib o‘tilgan holatlar yuzasidan viloyat Xalq ta'limi boshqarmasi, «Bino va inshootlardan foydalanishni muvofiqlashtirish va monitoring qilish» bo‘limi bosh mutaxassisi I.Yo‘ldoshevga murojaat qildik. I.Yo‘ldoshev bizga «bir yil davomida ta'mir borasidagi shikoyatlar 250-300tani tashkil etishi, ular orasida o‘n yildan beri ta'mirlab berilmayotgan ahvoli og‘ir, xom g‘isht va paxsa devorlardan iborat maktablar ham borligi»ni ma'lum qildi.  

«Ma'lumki, maktablarga prezidentimiz tashriflari uyushtiriladi. Buning uchun o‘sha maktablarning ta'mir darajasi zo‘r, namunali ko‘rinishda bo‘lishi kerak. Bundan tashqari, «Obod qishloq» dasturiga kiritilgan, Vazirlar Mahkamasi qarori asosida ro‘yxatga olingan maktablar ham bor. U maktab, uch yil avval ta'mirlanganmi, yoki ikki yil avval, farqi yo‘q, ta'mirlash uchun qayta ro‘yxatga olinadi. Biz birinchi galda ushbu maktablarni ta'mirlashga majbur bo‘lamiz. Qolgan maktablar esa o‘z-o‘zidan ro‘yxatdan tushib qolaveradi. 12-maktab bilan ham shunday bo‘lgan», deydi mutaxassis.

Yo‘ldoshev o‘zi ham maktab direktoriga qo‘ng‘iroq qilib, qurilish mollari keltirib qo‘yilgani, tuman moliya bo‘limi ta'mirni boshlashini buyurgani, lekin mablag‘ qachon o‘tkazilishidan darak bo‘lmayotgani, shu bois ishlar to‘xtab qolganini aniqladi. 

Buning sababini o‘rganish uchun, Muzrabot tumanidagi moliya bo‘limi boshlig‘i A.Xudoynazarov bilan uchrashdik. U «12-maktabning ta'mirga muhtoj qismlari uch yildan beri navbat bilan ta'mirlab kelinayotgani, avval maktab binosining chap qanoti ta'mirlangani, o‘tgan yili akfa deraza romlari va eshiklari o‘rnatilib, endi o‘ng qanotining tom qismi yopib berilayotgani, mazkur ishlar uchun jami 135 million so‘m mablag‘ ajratilgani»ni ma'lum qildi.

Ta'mir kechikkani bilan bog‘liq savolga esa moliya bo‘limi boshlig‘i bu bo‘yicha loyiha qonuniy kuchga kirishini kutishganini bildirdi va yaqin kunlarda yuqorida tilga olingan muammolar bartaraf etilishiga va'da berdi.