«Darband» postida tirbandlik - rasmiy bayonot berildi

Surxondaryo–Qashqadaryo chegarasidagi M–39 xalqaro avtomobil yo‘lining 1326-km qismida joylashgan «Darband» yo‘l-patrul postida kuzatilgan tirbandliklar bo‘yicha rasmiy izoh berildi. Ma’lumotga ko‘ra, og‘irlik nazorati qonuniy asosda amalga oshirilmoqda, me’yordagi yuk bilan harakatlanayotgan mashinalar postdan to‘siqsiz o‘tmoqda.

Foto: Ijtimoiy tarmoqlar

Hududiy idoralar xabar qilishicha, «Darband» postida o‘rnatilgan Tenso M VA–20P rusumli yuk tarozisi O‘zbekiston prezidentining hamda Vazirlar Mahkamasining qarorlariga muvofiq joylashtirilgan va Boysun tumani Yo‘llardan foydalanish korxonasi balansidan turibdi. Uskuna xususiy shaxsga emas, davlat muassasasiga tegishli.

Rasmiylarga ko‘ra, og‘irlik nazorati tizimining maqsadi — yo‘l infratuzilmasini asrash, harakat xavfsizligini ta’minlash va me’yordan ortiq yuk tashish holatlarining oldini olish. Ayni vaqtda viloyat IIB YHXB va Avtomobil yo‘llari bosh boshqarmasi nazorat jarayonlarini 24/7 rejimida monitoring va tahlil ostiga olgan.

Tekshiruvlar ayrim og‘ir yuk mashinalari nazoratdan qochish maqsadida post yaqinida yo‘l chetida to‘xtab turish kabi harakatlar orqali sun’iy tirbandlikka sabab bo‘layotganini ko‘rsatgan. Belgilangan tartibda nazoratdan o‘tish va harakatni davom ettirish taklif qilinganiga qaramay, ayrim haydovchilar bu talabni bajarmagani qayd etilgan.

Shu bilan birga, me’yordagi yuk bilan harakatlanayotgan avtotransport vositalari belgilangan tartibda to‘sqinliksiz o‘tmoqda, ular harakatida tizimli muammolar aniqlanmagani ma’lum qilindi.

Tayyorlagan: Отабек Матназаров

#Qashqadaryo #Surxondaryo #tirbandlik