Norvegiyaning eng boy odamlaridan birining rafiqasi uchun kriptovaluta talab qilindi

Norvegiyaning Lerenskug kommunasida mamlakatning eng boy odamlaridan biri – sarmoyachi Tom Xagenning rafiqasi o‘g‘irlab ketildi. Bu haqda VG nashri xabar berdi. 

Politsiya vakili Tommi Breskening aytishicha, 68 yoshli Anne-Elizabet Falkevik-Xagen o‘z uyidan 31 oktyabrda o‘g‘irlab ketilgan, biroq tergov manfaati sababli shu paytgacha bu haqda ma'lum qilinmagan.

Jinoyatchilar ayolni o‘ldirish tahdidi bilan uni qo‘yib yuborish uchun 9 mln yevro pul talab qilishgan. E'tiborli jihati, ular bu pullarni Monero kriptovalutasida to‘lashni so‘rashgan.

Ta'kidlanishicha, ayol o‘g‘irlangan joyda norveg tilida politsiyaga murojaat qilmaslik haqidagi xatcha topilgan. Uyda buzib kirish izlari topilmagan, atrofda esa kuzatuv kameralari bo‘lmagani sabab jinoyatchilarni izlash qiyin kechmoqda. Politsiya guvohlar topilishiga umid qilmoqda.