MDH tashqi ishlar vazirlari AQShning raketalar bo‘yicha kelishuvdan chiqishini muhokama qiladi

Moskvada 5 aprelda bo‘lib o‘tadigan MDH tashqi ishlar vazirlari kengashi yig‘ilishida AQShning O‘rta va kichik masofalarga mo‘ljallangan raketalarni yo‘q qilish to‘g‘risidagi shartnomadan chiqishi mavzusini muhokama qilish rejalashtirilgan. Bu haqda Rossiyaning hamdo‘stlik organlaridagi doimiy vakili Andrey Grozov ma'lum qildi.

"Bu mavzu darhaqiqat Atlantikadan Uralgacha bo‘lgan hududda xavfsizlik, strategik barqarorlikni ta'minlash masalasida dolzarb hisoblanadi. Mazkur mavzu tashqi ishlar vazirlari kengashida muhokama qilinadi... hamkorlarimizga Rossiyaning dalillari, xavotirlari yetkaziladi", dedi Grozov.

2 fevral kuni AQSh Rossiya bilan tuzilgan O‘rta va kichik masofalarga mo‘ljallangan raketalarni yo‘q qilish to‘g‘risidagi shartnomadan chiqdi. Bunga javoban Rossiya ham mazkur shartnomadagi ishtirokini vaqtincha to‘xtatib turishini ma'lum qildi.