Toshkentda drenaj tizimini takomillashtirish taklif etilyapti

“Mening fikrim” jamoaviy murojaatlar portalida Toshkent shahrida drenaj tizimini takomillashtirish haqida petitsiya paydo bo‘ldi.

Ta’kidlanishicha, Toshkent shahar drenaj tizimi bugungi kun talablariga javob bermaydi. Xususan, ariqlar faqat katta yo‘llarning yoqalarida saqlanib qolgan bo‘lib, mahallalar ichidagi ariqlar buzib tashlangan.

“Natijada daraxtlarni sug‘orish yoki kundalik tozalash ishlari uchun ichimlik suvidan foydalanishga to‘g‘ri keladi. Shuningdek, yomg‘ir yog‘sa ichki yo‘llardan umuman yurib bo‘lmaydi”, - deyiladi petitsiyada.

“Shu sababli Toshkent shahridagi drenaj tizimini talab darajasida ta’mirlash va rivojlantirish kerak”, - deb yozadi murojaat muallifi.

Eslatib o‘tamiz, avvalroq Toshkentda ko‘chalarda suv toshishi bilan bog‘liq holatlarga qarshi choralar ko‘rish boshlangani xabar berilgandi.

"Yog‘ingarchilik mavsumida Toshkent shahrining ayrim ko‘chalarida suv toshishi bilan bog‘liq ko‘ngilsiz holatlarni bartaraf etish maqsadida, irrigatsiya tarmoqlarini ta’mirlash ishlari amalga oshirilishi rejalashtirilgan", - deyiladi hokimlik xabarida.