8460.92 USD +2.76

9439 EUR -62.05

131.06 RUB +1.32

10760.6 GBP -234.16

10:50 / 06.03.2019 195512

Каримова иши. Талон-торож этилган пуллар нималарга сарфланган?

Фото: Yves Forestier / Getty Images

Ўзбекистонда яна Гулнора Каримова мавзуси барчанинг диққат-марказида бўлиб турибди. Республика Бош прокуратураси унга нисбатан қўлланилган жазо озодликдан маҳрум қилиш жазосига алмаштирилгани тўғрисида ахборот берди.

Маҳкама хабарида айтилишича, Г.Каримова жазони ўташ даврида суд томонидан ўрнатилган чекловларни мунтазам равишда бузиб, ўзига юклатилган мажбуриятларни бажармаган. У жазони ўташ тартиби ва шартларини қасддан бузишда давом этган, мунтазам равишда алоқа воситаларидан, шу жумладан, Интернетдан фойдаланган, жиноят иши бўйича аниқланган ўзи томонидан етказилган зарарнинг қопланишига фаол тўсқинлик қилган.

Бир қарашда оддийдек туюлган мажбуриятлар бажарилмаган. Ўз навбатида, Г.Каримованинг ўғли Ислом сўнгги вақтларда онасига босим бўлаётгани ҳақида жар солганди. Бироқ, Каримованинг ўзи белгилаб қўйилган тартибни бузиб, мажбуриятларини бажармаса, яна қандай босим ҳақида гапириш мумкин?!

2017 йилнинг ёзида Ўзбекистон Бош прокуратураси Гулнора Каримова иши бўйича маълумот берди. У 2015 йилнинг августида, яъни биринчи президент Ислом Каримов даврида қатор молиявий жиноятларда айбдор деб топилган ва озодликдан маҳрум этилган.

Сир эмаски, сўнгги вақтларда Гулнора Каримованинг ўғли қатор баёнотлар билан чиқди. Ўз-ўзидан савол туғилади: нима учун унинг ўғли Лондонда истиқомат қилиб, Ўзбекистонда онаси билан бўлаётган ҳолатга баландпарвоз баёнотлар билан жавоб қайтармоқда? Ўзбекистонга келиб, ҳақиқий ҳолат билан танишиш вақти етгандир, балки. Ёки у шундай тарзда иш тутиб, нималарга халақит бермоқчи?!

Оддий фуқарода шундай тасаввур пайдо бўладики, Ислом ва Г.Каримованинг қизи Имон ўз вақтида рейдерлик ва талон-тарож йўли билан орттирилган ҳамда Ўзбекистондан олиб чиқиб кетилган, айни дамда чет эл банкларида сақланаётган пулларни Ўзбекистон бюджетига қайтарилишига қаттиқ тўсқинлик қилишаётгандек. Тинимсиз баландпарвоз баёнотлар билан чиқишлар қилиниши шундан дарак бермоқда.

Боз устига, Имон ва Исломнинг инсон ҳуқуқлари топталиб орттирилган бойликларини ҳимоя қилиш учун кун тартибига инсон ҳуқуқларини пеш қилиб, ўзларини ҳимоя қилишга уринишлари жуда ҳам кулгили. Айниқса, Лондонда истиқомат қилиб.

Шу нарса аниқки, Ўзбекистонда бугунги кунда Гулнора Каримова томонидан талон-торож этилган ва ўз ҳақларини қайтариб ололмаган юзлаб компания ҳамда минглаб кишилар бор. Улар сабр қилиб, адолат қарор топишига умид қилиб яшаяпти.

Гулнора Каримова ва унинг ўғли ҳамда қизи нима учун курашаётганини аниқ тушуниш учун, у томонидан талон-тарож қилинган, минглаб тадбиркорлардан рейдерлик йўли билан эгаллаб олинган бойликларнинг юздан бир қисмига қараш кифоя қилади.

Қуйида Гулнора Каримовага тегишли бўлган кўчмас мулк ҳақида қисқача маълумот берилади:

25 Chesham street, London манзили бўйича 4 қаватли уйнинг 1, 3, 4 қаватлари.

Гонконгдаги кўчмас мулк

80A Moon Tower, The Arch, 1 Austin Road West, Kowloon, Hong Kong манзили бўйича жойлашган «Арка» турар жой комплексидаги пентхаус

БААдаги кўчмас мулк

Crescent Road West, The Palm Jumeirah, Dubai, United Arab Emirates, P.O.Box: 27722, Dubai, United Arab Emirates манзили бўйича жойлашган «JUMEIRAH ZABEEL SARAY» меҳмонхона комплексида жойлашган 31- ва 33-сонли виллалар (Zabeel Saray Royal Residence, Villa # 31, 33). Бошланғич нархи 43 млн доллар бўлгани ҳолда, 36,9 млн долларга сотиб олинган.

UAE, Dubai, Emirates Hills First, Bonnington tower Bldg, penthouse 4001—4003 манзили бўйича жойлашган «Bonnington, Jumeirah Lakes Towers» нуфузли турар жой комплексида жойлашган 4001, 4002, 4003-сонли учта пентхаус.

«The PALM JUMEIRAH» биринчи йўналишида қиймати 13,1 млн доллар бўлган ер участкаси.

Дубайнинг «DUBAI MARINA» туманида жойлашган «DAMAC HEIGTS» осмонўпар минорасидаги иккита квартира. Жумайра Пальма оролига қараган бу минорада 3, 2 ва 1 ётоқхонали, дунёдаги энг эксклюзив пентхауслар, дуплекслар бор.

«DAMAC HEIGTS» осмонўпар минораси

Франциядаги кўчмас мулк

Париж яқинида, Château de Groussay rue de Versailles 78490 Montfort l´Amaury манзилида жойлашган уй (шато) 2011 йилда тегишли ер участкаси билан 30 млн еврога сотиб олинган.

Париждаги квартира: Monyry 75015 Paris манзили бўйича (Марешаль Монори проспекти, Париж, Иль-де-Франс). Квартира 2007 йилда 30 млн еврога харид қилинган.

34 LOT Chenarae 1, 83580 Gassin манзили бўйича жойлашган, Сан-Тропедаги вилла. 2010 йилда 2,5 млн еврога сотиб олинган.

Сан-Тропедаги вилла

Россиядаги кўчмас мулк

Рублёвкадаги уй

Москва, Сивашская кўчаси, 6/1-уй, 58-кв. манзили бўйича жойлашган бир хонали квартира.

Москва шаҳри, Красин кўчаси, 21-уй, 1-қават манзили бўйича уч хонали квартира.

Москва, Комсомольский проспект, «Камелот» турар жой комплекси, 32-уй, 122-кв. манзили бўйича жойлашган, умумий майдони 420 квадрат метр бўлган уч даражали квартира

Қрим Республикаси, Ялта шаҳри, Береговое, Кипарисная кўчаси, 15-корпус манзили бўйича Қримдаги пансионат

Қрим Республикаси, Ялта шаҳри, Береговое, Кипарисная кўчаси, 50а-уй манзили бўйича жойлашган Қримдаги меҳмонхона

Швейцариядаги кўчмас мулк

7 Chemin De La Prévôté, Cologny, Geneva манзили бўйича Женева шаҳридаги икки қаватли вилла.

Женева кантони кўчмас мулк реестрида умумий майдони 2473 квадрат метр бўлган, икки уй ва учта қўшимча бинони (гараж, иссиқхона ва яна битта кичик бино) ўз ичига олган иншоот ҳамда ер участкаси бор. Швейцария матбуоти маълумотларига кўра, Г.И. Каримова уйнинг расмий эгаси саналади, у бу ҳашаматли турар жойни 2009 йилда 18,2 млн долларга сотиб олган.

Франциядаги вилла

Гулнора Каримованинг Сижжак посёлкасидаги қароргоҳи  

Г.Каримованинг «Бомбардьер глобал экспресс» самолёти, 48 млн долларга сотиб олинган

Хорижий банкларда сақланаётган кўплаб олтин ёмбилар

Жиноят ишлари бўйича Тошкент вилояти судининг 2015 йил 21 августдаги ҳукми билан Г.Каримова айбланаётган жиноятлар — жумладан, 2 трлн. 91,4 млрд. сўмлик солиқларни тўлашдан бўйин товлашни содир этишда айбдор, деб топилган.

Жиноят иши бўйича давлат ва фуқаролар манфаатларига етказилган зарарнинг умумий суммаси 1 трлн. 270 млрд. 200 млн. сўм, 1 млрд. 651,8 млн. АҚШ доллари, 26,1 млн. евро — миллий валютада жами 3 трлн. 746,8 млн. сўмни ташкил этади.

Бу пулларга қуйидаги ишларни амалга ошириш мумкин эди:

- 34 минг кам таъминланган оилага 2 сотихли намунали уй-жой харид қилиш;

- 20 минг 200 оилага 4 сотихли 4 хонали намунали уй-жой харид қилиш;

- Тошкент пропискасини қўлга киритиш имконини берувчи янги уйлардан – 10.008 та харид қилиш;

- 12,5 минг км қишлоқ йўлларини асфальт қилиш;

- 1 миллиард сўмлик замонавий қишлоқ мактаблардан 3746 та барпо этиш;

- 1441 та Миробод туманидаги Ш.Рашидов номидаги замонавий маҳалла маркази сингари янги маҳалла гузарлари бунёд этиш;

- умумий қиймати 254,5 млн. АҚШ доллари бўлган «Саломатлик-3» лойиҳасини тўлиқ 3,5 марта амалга ошириш мумкин: бунда республикамиздаги 172 та туман ва шаҳарлардаги тиббиёт бирлашмаларига ўртача қиймати 700-750 минг АҚШ долларни ташкил этадиган жиҳозлар 3,5 мартадан етказиб берилади.

- маргарин, қуюлтирилган сут ва майонез ишлаб чиқарувчи заводдан 918 та қуриш ва ҳоказо.

Гулнора Каримова иши бўйича шошма-шошарлик билан баландпарвоз баёнотлар бериш эмас, балки давлат ва фуқаролар манфаатини ўйлаб иш тутиш лозим. У томонидан етказилган зарарни, хорижда сақланаётган миллионлаб доллар маблағларни Ўзбекистонга қайтариб, мамлакат равнақи йўлида сарфлаш даркор.

Шуни алоҳида таъкидлаш лозимки, Гулнора Каримова биринчи президент Ислом Каримов Ўзбекистон раҳбари бўлган вақтда қатор молиявий жиноятларда айбдор деб топилиб, озодликдан маҳрум этилди.

Ўз навбатида, Ўзбекистоннинг амалдаги президенти Шавкат Мирзиёев даврида эса унга тайинланган жазо озодликни чеклаш жазосига алмаштирилди.

Бироқ, Гулнора Каримова худди аввалгидек қонунларга менсимаслик билан қараб, буни худди бўлиши керак нарсадек қабул қилди. Ваҳоланки, Ўзбекистонда 2 йилдан бери барча қонунлар ҳамма учун баробар ишлай бошлади.

Афсуски, у берилган имкониятдан тўғри фойдаланмади.

Top