O‘zbekiston va Belarus sog‘liqni saqlash vazirliklari o‘rtasida yirik farmatsevtika maydonini yaratishga doir kelishuvga erishildi. Bu maydonda ikki mamlakat vakillari hamkorlikda dori vositalari va tibbiyot mahsulotlari ishlab chiqaradi. Kun.uz muxbiri O‘zbekistonning Belarusdagi elchixonasidan olingan ma'lumotlarga asoslanib, shu haqida xabar berdi.
Sog‘liqni saqlash vaziri Alisher Shodmonov boshchiligidagi O‘zbekiston delegatsiyasining Belarusga tashrifi davomida farmatsevtika sohasida hamkorlik qilishga oid masalalar bo‘yicha muhokamalar o‘tkazildi.
Muhokamalar doirasida Belarus tomondan 15 dan ortiq davlat va xususiy farmatsevtika kompaniyalari qatnashdi.
Tadbir davomida O‘zbekiston tomon o‘zining farmatsevtika sohasidagi salohiyatiga doir ma'lumotlar bilan bo‘lishdi. Ilgari kelishilgan loyihalarni amalga oshirish masalalari muhokama qilindi - antibiotiklar (“Belfarm”), antiseptik vositalar (“Belaseptika”), va virusga qarshi preparatlar (“Belalek grupp”) va boshqalarni ishlab chiqarishni yo‘lga qo‘yish shular jumlasidandir.
Muhokamalar yakunlari bo‘yicha O‘zbekiston-Belarus yirik farmatsevtika ishlab chiqarish maydonini yaratishga doir kelishuvga erishildi. Ushbu maydonda hamkorlikda dori vositalari va tibbiyot mahsulotlari ishlab chiqariladi.
